Pa un periodo di 4 luna: “Caya grandi” lo ta habri pa auto desde 1 di december venidero

Diabierna ultimo Minister Ursell Arends hunto cu colega Minister Geoffrey Wever di asuntonan economico, a reuni cu un grupo di comerciantenan di “Caya Grandi”. E tema principal tabata Aruparking, pero tambe tabata tin un dialogo habri riba oportunidadnan pa mehoracion di comercio den Centro di Ciudad.

E realidad ta cu e cantidad di bishitante den caya grandi a keda abou asta despues di esfuersonan hasi pa gobierno nan den pasado. Ta obvio, cu un “approach” diferente ta necesario si ta desea un resultado diferente. Desde comienso di e gobernacion actual Ministernan en cuestion tabata tin Revitalisacion di Oranjestad halto den e lista di prioridad.

Durante e ultimo reunion comerciante nan presente a trece diferente ideanan y nan preocupacion nan dilanti, cual ambos mandatario a declara di lo tuma den consideracion. Un di nan tabata pa habri caya grandi pa vehiculo di motor y re-dirigi e tram pafo di Caya F. Betico Croes, den Centro di Oranjestad mas pronto cu ta posibel mirando cu esaki tabata un di e motibonan principal na deterioro di fluho di cliente pa e centro. Segun commerciantenan; e custumber di nos hende nan pa “window shop” y pick up y drop off” a bai perdi desde introducion di e dos medidanan aki.

Desde 1 di december venidero, Caya Betico F. Croes, den nos centro di cuidad lo ta habri pa trafico y tambe lo cambia e ruta di tram pa pasa pafo di Caya Betifo F. Croes y lo usa Plaza Daniel Leo como un punto di “drop off y pick up” di usuario nan .

Diamars durante reunion di Conseho di Minister, e peticion a ser presenta y a keda aproba Minister Arends ta duna di conoce, cu lo combina e esfuersonan aki cu esnan di Aruparking, cual lo sigui conscientisa chauffeurnan di auto riba nan responsabilidad pa parkeer responsablemente”.

Minister Wever “ta spera cu esaki por tin un efecto positivo pa e comerciantenan”, y si ta asina, lo hasiele parti di e maneho structural di e Proyecto di Revitalisacion di Oranjestad.

E cambionan lo keda den efecto pa 4 luna como proyecto piloto pa studia e efectonan real cu esaki tin ariba e fluho di hende y benta den “Caya Grandi”. Hasiendo esaki a cumpli cu e suplica di comerciante nan den Caya Grandi pa trese e cambio den e temporada di fin di aña, e temporada cu mas nan ta bende.