Fundacion Contra Violencia Relacional (FCVR), HIAS, UNHCR y Cedehm a uni ayera den un conferencia di prensa pa asina informa comunidad tocante nan campaña “Orange the World” e cual ta un campaña mundial contra abuso di mucha muhe y hende muhe.

Rish-Ann Ammerlaan di FCVR a splica cu esaki ta di shete biaha cu nan ta participa den e campaña mundial aki y na 2016 nan a cuminsa cune colaborando cu diferente organisacion caminda e aña aki e instancianan menciona for di dia 25 di november pa 10 di december lo tin yen di activismo cu e meta di conscientisa comunidad di Aruba pa e topico aki.

Fundacion Contra Violencia Relacional awe 24 di november ta bay ta na Centro di Bario Dakota for di 7.30pm te cu 9pm y mañan 25 di november na J.F Kennedy Center ta bay ta dirigi na e veeld social for di 2.30pm te cu 4pm, nan ta bay presenta un artista di Hulanda cu un obra teatral cu e topico di Abuso di Mucha, e nomber di e proyecto aki ta “Stop the Beating”, tambe el a menciona cu e artista ta trata cu temanan cu te ainda ta sigui keda como un tabu den comunidad “temanan cu ainda nos no ta durf di papia di nan y a base di e obra teatral, el a haci esaki pa spread y haci esaki discutibel”, el a bisa.

“Esaki ta interesante, caminda nos por wak e parti di violencia ta algo intergeneracional, e ta bin di generacion pa generacion y esaki den un obra teatral lo presenta esaki”, Ammerlaan a destaca.

Pa por participa den actividad pa awe na Centro di Bario Dakota nan ta solicita pa esunnan interesa subi riba Facebook page di FCVR, busca e post tocante esaki y e link pa registra.

Igualmente, nan ta bay recauda fondonan dia 26 di november, 03 di december y 10 di december pa asina ey e fundacion por sigui cu nan operacion na unda nan lo tin diferente boluntario riba caya como rotonde di Santa Cruz, rotonde di Noord, riba brug di Renaissance Hotel y tambe dilanti Imelda Kleuterschool.

Exposicion artistico cu prendanan di hende muhe victima di feminicidio rond di mundo

Di su parti, Carolina Bedoya di UNHCR a indica cu e tema di Orange the World pa 2022 ta “Uni” pa pone fin na violencia contra hende muhe y mucha muhe unda el a invita full comunidad di Aruba pa hunga un rol y hisa e voz pa kibra e silencio contra violencia contra hende muhe y mucha muhe.

Como representante di UNHCR cu ta uni na e causa aki, el a bisa cu awe for di 10am pa 8pm, mañan for di 6pm te cu 8pm y diasabra for di 9.30am te 12 di merdia na Cas di Cultura lo tuma luga un exposicion artistico yama “She’s Gone” unda un artista a recolecta prendanan di diferente hende muhe victima di feminicidio rond di mundo incluyendo un victima Arubiano.

“E ta un exposicion hopi impactante y nos kier invita pueblo di Aruba pa wak e prenda di e personanan aki cu lamentablemente a perde nan bida abruptamente door di feminicidio y e idea ta pa nos tur como comunidad ta envolvi den esaki pa kibra e situacion di violencia, pa e personanan cu awe ta victima di violencia pa nan sa cu nan no ta nan so”, Bedoya a comenta.

47.000 hende muhe y mucha muhe rond di mundo ta wordo asesina cada aña pa nan pareha of algun miembro di nan famia, den algun casonan, e crimennan aki no ta wordo resolvi.

“She’s Gone” ta un expresion di arte cu ta protesta contra e fenomeno global di asesinatonan pa motibo di genero cometi pa parehanan of miembronan di e mesun famia. E obra aki ta un grito den silencio na nomber di tur e victima inocente cu a wordo asesina pa e motibo simpel di ta hende muhe.

Art Banner contra violencia

Genesis Maduro HIAS a bisa cu nan ta contento di por colabora cu diferente instancianan local y internacional na Aruba unda HIAS lo tin e siguiente actividad for di 25 di november te cu 10 di december caminda henter Aruba ta invita pa participa den un ‘art banner’ unda por pone nan hand print na e banner aki, nan ta bay haci un tour rond di Aruba bishitando diferente instancianan.

Maduro a indica cu esaki ta bay ta manera un simbolo unda tur ta para keto den solidaridad contra violencia contra hende muhe y mucha muhe, si un organisacion of instancia ta interesa pa participa den esaki y bisa no contra violencia por yama nan na e number di telefon 730.77.65.

Red Tent pa duna sosten

Jeanine Tromp di Centro di Desaroyo di Hende Muhe (Cedehm) tambe ta bay forma parti di e 16 dia di activismo unda dia 8 di december nan ta organisando un Red Tent caminda e ta bay ta un sosten pa un grupo di hende muhe unda nan ta bay usa e tema contra violencia di genero y asina por conscientisa e pueblo di kico e parti di violencia contra hende muhe y mucha muhe ta.