Ministerio di Comercio y Industrianan di Panama a traves di su vice-ministerio di Comercio Exterior a invita medionan di comunicacion local na un evento denomina “Trade Mission Panama to Aruba” cu e obhetivo di estrecha lasonan comercial entre Panama cu Aruba.

Miembronan di e mision comercial, hunto cu Eric Dormoi director nacional pa promocion di exportacion di Republica di Panama, Sue- Ellen de Freitas representante di Camara di Comercio di Aruba conhuntamente cu minister di Asuntonan Economico, Comunicacion y Desaroyo Sostenibel Geoffrey Wever ayera mainta a inaugura e prome edicion di Trade Mission Panama to Aruba na Renaissance Convention Center.

Como parti di un plan di accion di Gobierno di Republica di Panama nan a implementa programanan integral pa identifica y probecha oportunidadnan den region, Panama como hup logistico tin e capacidad di ofrece na nan bisiñanan den Caribe y Centro America productonan bao standard exigente asina como e opcion pa acerca su clientenan potencial.

Ta pa e motibo aki cu nan a bin Aruba unda e sector empresarial ta forma parti di nan vision di desaroyo economico cu e region ta rekeri y cu e cual nan ta espera estrecha lasonan comercial.

Eric Dormoi director nacional pa promocion di exportacion di Republica di Panama a splica conectividad entre Panama cu Aruba ta hopi importante na e momentonan aki unda tin un guera na Ucrania cu a trece retonan y desafionan grandi igualmente cu pandemia di Covid-19, “Esaki ta e momentonan unda nos tin cu fortalece nos lasonan, relacionnan di amistad, di conectividad y comercial”, el a bisa.

Ademas, el a trece dilanti cu Panama ta cla pa ofrece Aruba diferente productonan di companianan exportado “esaki ta interesante pasobra hende por puntra si Panama ta haci mashin di ijs, por ehemplo, y e contesta ta si, p’esey nos kier pa Aruba wak nos manera un opcion pa ta un proveedor”, Dormoi a comenta.

Di su parti, minister Geoffrey Wever a duna algun palabranan den e inauguracion unda el a destaca cu e evento aki ta uno special, importante y unico cu ta ofrece e oportunidad pa fortalece e lasonan empresarial unda tambe minister Wever ta confia cu esaki ta bay fomenta ainda mas e lasonan economico y comercial entre e dos pais.

Den temponan aki cu diferente panorama politico, economico y comercial den e region na Latino America y Caribe, unda comercio, inflacion y cooperacion economico ta sigui como elementonan central di e asociacion strategico, minister a expresa cu e kier mira algun formanan di promove e costonan y profundisa e vinculonan pa e beneficio mutuo.

Economia di Aruba ta mehorando despues cu a perde aproximadamente 22.5% di e actividadnan economico pa via di impacto di pandemia di Covid-19, segun pronosticonan di Departamento di Asuntonan Economico di Aruba economia ta bay crece cu un 10% entre 2022 y pa aña 2023 e proyeccion di crecemento economico ta di 4.5% nominal.

E recuperacion di sector di turismo y inversionnan priva tin e impulso di crecemento economico cu tambe ta representa areanan di interes pa e companianan.

E proyeccionnan di Fondo Monetario Internacional tambe ta indica e recuperacion economico di Aruba unda pandemia a demostra na tur e balor y importancia di explora otro fuentenan di progreso economico y no keda depende solamente di turismo, manera minister Wever a indica.

“Tin cu crea oportunidadnan pa companianan por crece, no solamente den nan mercado local pero tambe den e mercado internacional, pa esaki, recientemente nan a modernisa e maneho di permiso mercantil, y awor ta mas facil y ta completamente digitalisa, na e momentonan aki nan ta actualisando e leynan di zona liber “free zone” pa facilita e tipo di negoshinan ey”, el a bisa.

E posicionnan geografico tanto di Panama como di Aruba ta duna mas rason pa fortalece ainda mas e lasonan comercial y economico, segun el a declara. Igualmente ta importante cu gobierno ta facilita e lasonan den e rueda di negoshinan aki pa e fortalecemento di e lasonan y pa traha mas intensamente.