Ex presidente di Camara di Comercio di Aruba y presidente di e comision encarga cu Caya Grandi, Omar Tromp a bisa cu e area comercial aki ta pasando den un di su “mal momento” aworaki.
Pero e ta haya cu e ta un problematica cu ta tumando luga pa un par di aña caba debi na e conhugacion di diferente factornan. “No ta di awor e ta asina.” Sinembargo el a señala cu actualmente e construccion di mas shopping mall ta birando un menasa pa e comerciantenan di Caya Grandi. E ta haya cu a yega momento pa defini kico ta Caya Grandi ya sea e caya principal so of si tambe e bisindarionan ta forma parti di dje. “E mallnan cu ta lanta pafo di caya of di Oranjestad, ta birando un problema.”
Nan ta mallnan cu hasta a wordo construi nan ta bashi, specialmente den e zona di e hotelnan. Tromp a bin cu e reflexion si berdaderamente nos pais tin e mercado cu por sostene tanto mall asina. E ta kere cu un ley di zonificacion unda ta wordo determina unda si of unda no mester bin cu mas mall. “Pero tin cu wordo haci algo pasobra e mercado mes lo tuma su desaroyo, y hopi di e mall akinan lo por ta hasta cera.”
Sinembargo e ultimo tempo e introduccion di Aruparking tin un influencia riba e area di Caya Grandi, ya cu e implementacion di esaki no a bay den un bon manera. Pero e situacion tin diferente nivel te hasta ora cu gobierno a bin cu un proyecto pa embeyece e area aki den centro di ciudad cu a tarda hopi pa bin cla, el a laga sa. Pero sr. Tromp a reitera cu no ta un Aruparking so sino diferente factor cu a hunga un rol no faborabel pa e actividad comercial den caya grandi y bisindario.
