Mientras mundo ta bay den recesion despues di e golpi na economia mundial causa pa e pandemia di Covid-19 sigui pa e guera na Ucrania, por nota e “caida” di monedanan fuerte, manera Euro of Pound Sterling, cu ta perde balor compara cu e dollar Mericano. Sinembargo, e Florin Arubano ta keda stabiel. Kico ta e motibo tras di esaki?
E Florin Arubano semper ta mantene su balor referente na e dollar Mericano. Si e dollar subi of baha compara cu otro monedanan na mundo, e Florin ta subi of baha hunto cune. E motibo di esaki ta uno historico.
Antias Hulandes inicialmente tabata usa Florin Hulandes na añanan 1700, prome cu cambia pa e real Spaño entre 1799 y 1828. E Florin Hulandes a bolbe na 1828 te cu ocupacion di Aleman di Hulanda durante Segundo Guera Mundial. Despues a introduci e Florin Antiano nobo, cual a “peg” na e dollar.
Un “currency peg” ta un politica den cual un gobierno nacional of Banco Central ta pone un tasa di cambio fiho pa su moneda cu un moneda stranhero of un basket di moneda, y ta stabilisa e tasa di cambio entre paisnan. Mientras algun moneda ta flota y e tasa di cambio ta varia basa riba suministro y demanda den e mercado, otronan ta fiho y “pegged” na otro moneda. Pegging ta duna predictabilidad a largo plaso pa planeamento di negoshi y ta yuda promove stabilidad economico.
Inicialmente a peg e Florin Antiano na e dollar Mericano pa 1.8858 florin pa dollar. Hulanda a cambia e peg na 1.79 Florin pa dollar Mericano na 1971.
Tempo cu Aruba a obtene su Status Aparte dentro di Reino di Hulanda na aña 1986, como parti di e proceso pa autonomia, Aruba a adopta e Florin y alabes a adopta e mesun peg di moneda cu su predecesor, esta 1.79 Florin pa dollar Mericano.
Segun Banco Central di Aruba (CBA), a otorga CBA e responsabilidad pa emiti papel di placa di Florin segun e Ordenansa di Banco Central, seccion 7.Ademas, Banco Central di Aruba ta emiti moneda den nomber di gobierno di Aruba. Confiansa den e biyetenan ta hopi importante mirando e status di Florin como forma di pago legal di Aruba, y su funcion como medio di intercambio, unit of account, y almacenahe di balor. Den e sentido aki, CBA mester sigura cu e biyetenan cu ta trece den circulacion ta di excelente calidad y ta cumpli cu standardnan halto di seguridad.
Segun economista Rendell de Kort, e idea tras di e escogencia pa un “fixed exchange rate” ta entre otro cu gobierno no tin e libertad pa amplia e base monetario, es decir, print placa. E peg cu e dollar ta wordo manteni door di mantene inflacion domestico cerca di inflacion di e dollar.
Ademas, De Kort ta splica cu den caso di Aruba, cu ta importa mayoria di producto den dollar, e ta make sense pa mara nos moneda na dollar.
Print placa ta directamente conecta na inflacion. Segun Investopedia, e suministro di placa di un pais ta un contribuidor mayor den caso cu inflacion ta tuma lugar. Mientras un gobierno ta evalua condicionnan economico, metanan di stabilidad di prijs y desempleo publico, ta promulga politicanan monetario y fiscal specifico pa promove e bienestar di su ciudadanonan a largo plaso. E politicanan aki por afecta e suministro di placa, y cambio na e suministro di placa for causa inflacion. Inflacion por sucede si e suministro di placa ta crece mas rapido cu e output economico bao circunstancianan economico por lo demas normal. Den e caso aki, e aumento den cantidad di placa circulando den un economia ta mas halto cu e aumento den cantidad di producto produci, pues tin mas placa tras di no mesun hopi producto den e economia. Inflacion ta e tasa na cual e prijs averahe di bienes y servicio ta aumenta durante tempo.
De Kort ta splica cu inflacion por tin dos causa principal. Cost push inflation ta causa door di factornan externo, por ehempel, ora e prijs di productonan cu ta importa ta subi, manera prijs di petroleo of productonan di alimentacion. E otro ta demand pull inflation, cu ta un situacion domestico ora tin hopi demanda localmente, y door di esey e prijsnan ta aumenta. Esaki no ta e caso na Aruba, pero por ehemplo na Bonaire si tin esaki, caminda cu tin hopi presion riba prijs local. De Kort ta aclaria cu tiki demanda no ta crea inflacion, al contrario, net ta hopi demanda ta crea inflacion.
Otro factor cu ta contribui na e stabilidad di e Florin Arubano ta e reserva di divisa. Segun De Kort, e reserva di divisa ta e “buffer” cu Banco Central di Aruba tin den monedanan internacional – principalmente dollar, pero tambe un tiki Euro por ehemplo – pa den caso cu cualkier cos pasa cu no tin suficiente dollar ta yega Aruba, Aruba toch por sigui cumpra dollar pa paga cune den exterior. Si reserva di divisa no ta grandi, esaki por crea duda cu e Florin por mantene su balor compara cu dollar. Afortunadamente Aruba no a yega di experimenta e tipo di problema aki.
Pa finalisa, De Kort ta bisa cu tanten cu e confiansa den e Florin ta mantene, y tin reserva internacional pa salvaguardia e balor di e Florin, esaki ta un maneho monetario [e peg na e dollar] cu desde Status Aparte tabata sumamente exitoso. E stabilidad financiero cu e Florin a crea tabata un pre-condicion importante pa e crecemento economico fuerte cu Aruba a experimenta desde Status Aparte.
