Dokternan ta enfrentando mas menasa y agresion

(NLTimes) – Mas di un tercer parti di dokternan a keda menasa of intimida por lo menos un biaha, segun un investigacion haci pa federacion di dokter KNMG. Mas di 1 den cada 10 a ricibi menasanan di morto. Desde e pandemia di coronavirus, e abuso y agresion verbal a aumenta den varios sector segun unionnan laboral FNV y CNV.

KNMG a conduci investigacion entre 562 dokter. E menasa den can contra ta cambia di asalto verbal na fisico y menasanan online te na acoso of menasa na e famia di e dokternan. Mayoria menasa ta bini for di pashentnan of nan sernan keri, sinembargo dokternan tambe ta confronta cu agresion di ciudadanonan of gruponan di accion fuera di e camber di consulta. E agresion ta causa stress, KNMG a bisa. Dokternan a bisa cu nan ta sinti menos sigur na trabao.

Segun KNMG, e menasanan ta forma un “riesgo di falta di dokter na trabao y te hasta terminacion di e profesion medico.” President di e federacion Rene Heman a comenta cu “mirando e gran escasez den e sector di cuido di salud, nos mester retene tur dokter pa e profesion aki. E ta den tur nos interes. Esaki ta un motibo adicional pa tuma accion contra agresion y asina preveni mas perdida di dokter.”

Solamente 6 porciento di e dokternan a reporta agresion na cuerpo policial. Dokternan no ta reporta e incidentenan pa motibo cu nan ta pensa cu esaki ta parti di nan profesion, segun 23% di nan, y otronan ta pensa cu esaki no ta bay cambia nada y cu nada lo pasa cu e reportahe, segun 40%. Algun no a kere cu e menasa ta suficientemente severo pa tuma accion pa cu esaki, segun 41%.

Linda Vermeulen din FNV tambe a nota cu e empleadonan ta confronta cu comportamento intimidante, specialmente awo cu e temporada cu ta acercando. “Nos ta tende cu e luganan ta birando cada biaha mas druk. Nificando cu tin hopi trabao riba lomba di esunnan cu ta trahando y nan ta reporta cu e clientenan no ta compronde ora cu nan no por ricibi atencion inmediatamente. Regularmente nan ta reacciona cu falta di pasenshi.”

Segun e dos directornan di e unionnan, escasez di empleado ta un causa importante. “Desde coronavirus, empleadonan ta trahando cu menos colega. Dunadornan di empleo por combati e problemanan aki pa medio di haci nan miho esfuerso pa retene empleadonan. Esaki tambe ta miho pa e clientenan,” Vermeulen a splica.