Diahuebs durante henter un dia, Minister di Transporte, Integridad, Naturalesa y Asuntonan di Adultonan Mayor, Ursell Arends hunto cu su ekipo a topa cu trahadonan di Serlimar unda a duna aclaracion di e situacion di Serlimar.
Durante e encuentro a duna un splicacion amplio di con Serlimar a yega den e posicion cu e ta awor. Segun un comunicado di gobierno, aki diferente trahado a bin compronde cu debi na metemento politico Serlimar tin un debe di alrededor di 20 miyon florin. Esaki ta haci cu e compania a bira practicamente bancarota.
Ademas, a duna mas detaye pa loke ta trata e plan y vision pa futuro di Serlimar.
Di principio cu Minister Ursell Arends a asumi su puesto como Minister a cuminsa traha un “blue-print” di con ta bay rescata Serlimar alabes trece un solucion pa e problematica di desperdicio cu e isla completo ta biba cune.
Pa logra esaki mester cuminsa na tuma decisionnan prudente pero tambe cooperacion y determinacion di banda di Gobierno como tambe di banda di trahadonan.
Lo cuminsa crea un structura solido pa Serlimar pa asina sigura un futuro pa tur su trahadonan y alabes pa Serlimar por bira competitivo riba mercado nacional. Minister Arends a aloca fondo pa yuda cu e proceso aki.
Sigur un encuentro fructifero unda cu trahadonan a keda contento di por a tende e berdad for di esnan concerni y no sigui kere den informacion nan eroneo cu tin ta sali afo via medionan di comunicacion y rednan social. Minister Arends a haci un suplica na ambos gerente y trahadonan pa yega na palabracionnan concreto y pa cu e comunicacion entre tur parti wordo mehora na beneficio di tur.
Trahadornan di Serlimar di nan banda a expresa cu loke nan tabata kier ta pa haya claridad pa e trahadornan, cu tabata pasando den hopi incertidumbre pa cu e situacion y futuro di Serlimar. Un trahador, kende a bisa di tin 35 aña den servicio di Serlimar, a comenta cu ta mirando progreso, y ta gradici Arends cu a sali afo pa informa e trahadornan y trece trankilidad entre nan. Alabes el a pidi comunidad pa “tene un tiki pasenshi cu nos. Tin varios reclamo eyfo pero nan ta bay wordo resolvi poco poco. Manera cu nos por, nos lo trata di hacie na un manera mas bon cu ta posibel.” Un trahador di helpdesk a comenta cu e ta tende di cliente tur dia, clientenan ta bin haci pregunta y e no tabata sa con pa contesta nan. “Awor si mi por bisa, esaki ta bay sucede, barinan ta na caminda. Awor nos por contesta nan cu seguridad cu Serlimar t’ey pa keda.”
Di su banda, mediador di gobierno, Anselmo Pontilius a comenta cu e ta kere cu tabata “hopi importante cu e trahadornan por a scucha cu e garantia di existencia di Serlimar, e futuro di Serlimar, con ta bay ta atende cu esaki”. El a bisa cu siman pasa a recomenda na minister pa sinta hunto cu e trahadornan y sindicato y pecura pa tin acuerdonan por escrito cu ta garantisa e cupo di trabao di e trahadornan, atende cu e diferente reclamo cu e trahadornan a expresa, y percura pa duna un contesta por escrito. Entre otro, Pontilius a remarca cu e trahadornan tin reclamo pa coreccion pa nan salario, y su recomendacion tabata pa minister palabra riba esaki, “ki dia por y ki dia no por”. “Den e situacion dificil cu Serlimar ta, por lo menos e parti cu a resalta ta cu gobierno ta poniendo fondonan disponible pa paga e debenan cu Serlimar tin cu cumpli cune.”
Na mesun momento el a recomenda pa informa clientenan cu Serlimar ta bay continua existiendo, y pa esnan cu tin suma pendiente pa paga pa acerca Serlimar pa trata di yega na un acuerdo. “E ta responsabilidad di nos tur pa cuida un compania cu ta di Pais Aruba”, Pontilius a comenta.
Pa finalisa, director di Serlimar, Melizta Geerman a comenta cu e topiconan discuti tabata sumamente importante pa nan haya atencion, “y tambe pa nos tin tur hende riba un linea” den parti di situacion actual di Serlimar, financieramente unda kier bay, kico ta duna Serlimar derecho di existencia y unda kier bay den futuro y con ta bay yega eynan. El a bisa cu a discuti tur esaki cu empleadonan pa nan “tur ta e mesun linea pa traha na e bienestar general di desperdicio na Aruba.”
