(AP) — Expertonan di Ucrania a join investigadornan Polaco y Mericano investigando un explosion di misil cu a mata dos homber den oriente di Polonia e siman aki.
Minister Ucraniano di Exterior, Dmytro Kuleba a bisa ayera cu expertonan Ucraniano tabata na e facilidad pa seca grano na pueblo Polaco di Przewodow, unda e misil a cay diamars ultimo. E pueblo ta ubica como 6 kilometer for di frontera Polaco cu Ucrania.
“Nos ta bay continua nos cooperacion den un manera habri y constructivo, manera amigonan cercano ta haci”, Kuleba a tweet. “Mi ta gradici e banda Polaco pa duna nan acceso.”
Medionan di comunicacion Polaco a reporta cu a mira oficialnan Ucraniano den uniform yegando na e sitio ayera merdia.
Riba diamars, dos trahador a fayece na momento cu un proyectil a cay riba e facilidad di seca grano. Ucrania tabata victima di un bombardeo Ruso pisa e dia ey.
NATO y lidernan Polaco ta bis cu e misil mas probablemente a bin for di un sistema di defensa aereo Ucraniano, cua lansa den respuesta na e atake di Rusia. Autoridadnan Ucraniano inicialmente a bisa cu e misil no tabata di nan, y a pidi pa join e investigacion.
Expertonan Polaco y Mericano ta trahando na e sitio henter siman pa establece e fuente y circunstancia di e lansamento di e misil. Oficialnan Polaco ta bisa cu tin video graba di e eventonan conduciendo na e explosion, pero esakinan ta keda clasifica.
Funeral estatal pa e dos fayecido ta spera pa tuma lugar durante weekend.
