San Nicolas Business Association ta un instancia cu for di algun añanan caba ta bin haciendo esfuersonan pa loke ta trata e desaroyo den districto di San Nicolas unda cu recientemente a bira conoci un directiva nobo cu ta consisti di 9 miembro pa e periodo di 2022-2024 caminda Errol de Freitas a resulta eligi como presidente nobo.

Den un entrevista pa Bon Dia Aruba, de Freitas a expresa cu e vision cu e tin awor como presidente ta un documento bibo y ta cosnan di un organisacion cu tin mas cu 50 aña y cu e circunstancianan rond di e districto lo cambia pero e vision ta intacto pa e progreso y aspecto comercial no solamente di San Nicolas sino den area denomina ‘Pariba di brug’.

Durante pandemia nan a tuma e reto social pa ta envolvi cu e comunidad tambe, aworaki loke nan ta bezig cune ta cu door cu San Nicolas ta den wowo di tur hende pa motibo cu ta e ultimo frontera pa desaroya, awor nan mester ta consciente con nan ta bay desaroy’e pa ta sigur cu comunidad lo ta envolvi y tambe nan ta esnan cu mester disfruta y desaroya. Esey ta e vision a corto plaso, manera el a sigura.

Awor nan ta bezig cu e parti di formacion di e directiva nobo cu ta bay sosode den proximo dianan aki unda despues nan lo yama prensa pa asina informa comunidad di e puntonan mas cardinal cu nan ta bay para pe pa e proximo dos aña.

Den e National Transformation Map cu a wordo presenta den un foro politico na EPB di San Nicolas, segun De Freitas esey tabata pa inculca e votadonan di pariba di brug ripara y scucha for di e politiconan kico nan ta bay haci.

Ora gobierno tabata den proceso di gobernacion De Freitas a señala cu nan tabata e unico organisacion cu a hiba un manifiesto na gobierno cu 20 punto, den nan tabatin algun cu a wordo logra caba cu ta IMSan e cual a bira un instituto independiente unda cu 42% di e poblacion di Aruba ta biba pariba di brug.

Ademas, el a informa cu nan ta bin teniendo varios reunion cu gobierno unda nan ta pendiente cu proyecto di Sero Colorado, nan ta bezig cu e terminacion di Caya Principal cu mester keda cla pa lo cual cu ta bay pasa, nan tambe ta bezig pa duna sosten na e ‘zona roja’ y nan a sostene e Aruba Art Fair, “kiermen tin mas manera pa nos yuda cu esaki, awor nos ta papiando cu Camara di Comercio pasobra e idea ta cu nos mester cuminsa prepara nos hendenan pa lo cual ta bin”, De Freitas a sigura.

Cu e construccion di tres hotel den area aki, den su opinion De Freitas ta sigura cu nan mester sigura pa e beachnan ta amplio, limpi y organisa na un manera netjes unda cu tambe ta bay ripara di un directiva hopi dinamico “y lo cual tur esaki cu nos ta haciendo e ta parti cu nos no por haci’e si comunidad no ta envolvi, e ta un relacion entre nos cu e comunidad, nos mes no por haci nos so y nos no kier haci’e asina ey tampoco”.

Dia 6 di december lo tuma luga un conseho di minister den area aki conhuntamente cu 7 compania cu ta cla pa ranca sali, manera el a sigura, nan ta interesa den desaroyo pa Caya Grandi unda nan ta buscando edificionan y oportunidad na San Nicolas.

“E turista no ta bin San Nicolas pa nos perfeccion, e ta bin pa nos imperfeccion y si bo realisa bo ta wak tur lo cual cu ta musica, arte, cultura y cuminda, un parti cu ta autentico di e isla”, el a bisa.

Den su opinion, den districto di San Nicolas ainda ta falta haci manera un Linear Park of un area unda hende por haci movecion, cana of core bais, hopi caminda den Colony no tin luz y den esaki, el a trece dilanti e accidente cu a tuma luga algun luna pasa unda lamentablemente a reporta tres persona fayecido “esaki ta e momento cu nan tin cu laga e desaroyo ey pasa”, el a bisa.

Di loke ta trata gobierno, el a señala cu nan ta haya atencion pero ta falta e realisacion aunke sinembargo, tin e boluntad “no tin ni un momento cu nos a bati na porta di gobierno cu nan no ta cla pa ricibi nos, esey ta algo cu ta hopi positivo”.

Tambe, a wordo treci dilanti e situacion di hotel Secrets Baby Beach cu manera De Freitas a declara, e mester ta clarificando na e momentonan aki di un manera of otro, nan no ta directamente envolvi den dje pero su construccion a sigui “y nan tin cu continua pasobra nan tin cu habri nan porta y sino e no ta cumbiniendo tampoco y mi ta kere cu e boluntad general ta un necesidad, nos mester di un desaroyo pero e diferencia ta cu nos kier un desaroyo calcula y structura caminda e turista por difrut’e pero pueblo di San Nicolas y comunidad di Aruba tambe, esey ta importante.

El a finalisa informando cu pa december awor, Pasco ta bay wordo inaugura na San Nicolas cu un feria cu tur cos cu ta di pariba unda el a haci un yamada na personanan interesa pa participa den esaki como vendors pa tuma contacto cu nan por medio di nan Facebook Page di San Nicolas Business Association.