For di area di Mangel Halto minister di Turismo y Salud Dangui Oduber a anuncia un proyecto nobo den cuadro di mehoracion di producto Aruba pa asina ey renoba infrastructura cu den ocasion aki ta bay tuma luga na e area ey.
Manera ta conoci, for di algun tempo e palapanan y gazebonan na Mangel Halto ta den mal estado unda algun di nan tambe a wordo vandalisa y pa cu esaki, ministerio di Turismo y tambe Aruba Tourism Authority (ATA) a tuma nota di esaki y tur embeyecemento manera minister Oduber a sigura, esey ta forma parti di e vision y maneho cu nan ta bin hibando den ultimo tempo.
E maneho y vision aki ta enfoca pa trece turistanan afluente y esunnan cu ta gasta hopi placa pa economia di e isla, percura pa diversifica turismo den diferente mercadonan unda igualmente minister Oduber a menciona cu otro aña lo ricibi e vuelo for di London cu British Airways y keda haci inversionnan continuo den mehoracion di producto Aruba.
Pa e motibo aki nan a anuncia e proyecto di drechamento di tur e gazebonan y palapanan cu ta bay cuminsa otro siman, nan ta bay percura pa drecha 11 gazebo cu lo ta completamente nobo y tambe 3 palapa cu ta ubica den un area cu constantemente ta wordo bishita pa turistanan y localnan “ta p’esey cu nos ta bay percura pa nos mantene y upgrade e area aki pa asina nos duna e servicio tambe na nos localnan y turistanan cu ta bishita e area aki”, el a bisa.
Pa algun tempo caba e area aki ta forma parti di Parke Marino y ta wordo maneha pa Fundacion Parke Nacional Aruba cu ta percura pa conserva y cuida naturalesa y tambe conhuntamente cu tur e partners pa haya financiamento pa mantencion di henter e area, ta p’esey cu den cuadro di bon cooperacion entre Ministerio di Turismo, ATA y tambe Fundacion Parke Nacional Aruba a busca e financiamento necesario pa haci inversionnan aki, pa trabounan por cuminsa otro siman y den un corto tempo por tin tur e palapa y gazebo completamente nobo.
Ronella Croes CEO di ATA a expresa cu banda di e proyecto aki di Mangel Halto, nan tambe tin e intencion di drecha e palapanan na Arashi pero tambe na Boca Catalina,e renobacion di tur e boeinan cu tin den diferente zona di e playanan di Aruba lo continua den aña di 2023 unda cu ATA tin na su encargo e parti aki tambe.
El a gradici Fundacion Parke Nacional Aruba pa motibo cu den dialogo cu otro proyectonan por ehemplo, pone borders den areanan cu tin duinnan pa asina ey por blokia e trafico cu no ta permiti den areanan aki “ta cosnan bunita pa subraya, cosnan grandi cu por tin hopi impacto y cosnan chikito cu tin nan impacto tambe”, Croes a bisa.
Ademas, el a declara cu nan tin e ekipo completo cu tin na su encargo tambe cu ta e mountain bike trails pa motibo cu esaki tambe lo mira impacto den proximo simannan y lo haya su atencion debido, esaki ta compronde di 54 kilometer mountain bike trails.
“Pero ATA lo sigui su compromiso pa cu nos playanan, banda di aspectonan cultural, banda di aspectonan di naturalesa, nos lo sigui cu nos compromiso tambe pa sigui inverti parti di fondonan cu ta bin di turismo y sigui invirti’e back den turismo asina aki pa beneficio di nos turistanan pero tambe pa beneficio di nos comunidad”, el a sigura.
Si tur cos sigui bay manera ta den e planificacion, pa comienso di otro aña tur cos lo ta cla tambe, el a anuncia.
Mas cooperacion di polis pa vigila e areanan turistico
Manera a bira conoci riba cierto medionan di comunicacion, dos palapa di Mangel Halto a wordo kima pa personanan desconoci unda cu a bin dilanti e pregunta dicon ta tarda mas o menos tres of cuatro luna pa drecha nan pa loke minister Oduber a comenta cu esey a bay asina largo pa motibo cu pa tur proyecto tin cu prepara, busca ofertanan y ta un proceso cu tin cu wordo encamina pa ATA y asina ey busca e fondonan necesario y trabounan por cuminsa.
Pa e motibonan aki el a tuma hopi tempo pero cu ora nan a wordo notifica di e vandalismo ya caba nan a cuminsa prepara e proyecto aki cu otro siman ta bay cuminsa.
Minister Oduber ta desea pa pone camaranan den tur e atraccionnan aki cu ta wordo bishita mas pa localnan y turistanan pa asina preveni cu vandalismo lo sigui tuma luga no solamente na Mangel Halto sino tambe na otro areanan como Malkmok.
Di esaki, el a menciona cu nan ta bay cuminsa den area di High Rise y lo continua den otro areanan strategico unda nan a pidi cooperacion di Cuerpo Policial di Aruba pa por tin mas vigilancia den areanan aki pa yuda mientras nan ta sigui busca financiamento pa cumpra camaranan.
