Cu hopi entusiasmo CEDE ARUBA a presenta su ‘compas strategico’, un plan amplio pa desaroyo di comunidad di Aruba. Den presencia di su Excelencia, Gobernador Interino Sr. Agustin Vrolijk, Minister di Husticia y Asunto Social, Sr. Rocco Tjon, representantenan di directiva di CEDE ARUBA y un cantidad grandi di fundacion y instancia social den nos comunidad, a presenta e logo nobo y tambe duna un splicacion di e pilarnan strategico di CEDE ARUBA.
Na comienso di e evento a haci un recorido di e 42 añanan di CEDE ARUBA su trabou di duna sosten na iniciativanan di trabou den nos comunidad. Un historia cu ta data for di 1980 ora cu Aruba tabata forma parti di Antiyas y den e constelacion ey a cuminsa cu CEDE ANTIYAS. Na 1986 CEDE ARUBA a bira independiente a traha cu fondo di KABNA. For di 2000 CEDE ARUBA a wordo financia for di Fondo di Desaroyo di Aruba (FDA) y a cominsa colabora cu Samenwerkende Fondsen Cariben.
Hunto a logra sostene un cantidad di programa y proyecto valioso cu te día di awe ta funcionando. Na 2017, Gobierno di Aruba a firma un acuerdo di colaboracion a termino largo cu CEDE ARUBA y Samenwerkende Fondsen Cariben. Esaki a haci’e posibel cu CEDE ARUBA por a crese y yega na mas partners internacional. CEDE ARUBA ta e unico organisacion cu ta opera den un forma asina ariba e islanan de Reino, e unico CEDE cu a keda despues di CEDE ANTIYAS.
Despues di parti historico aki, a presenta e logo nobo, cual ta un logo diferente y colorido cu ta e simbolo pa e diferente papelnan di CEDE ARUBA. E papelnan cu CEDE ARUBA tin ta duna y intermedia pa fondo, traha na mehora capacidad di organisacion, abogacia pa gruponan den minoridad, traha na colaboracion entre iniciativa y yuda desaroya iniciativa nobo. E compas ta para central den e logo mirando cu CEDE ARUBA ta yuda busca direccion den nos desaroyo di comunidad.
E compas strategico ta basa ariba 4 pilar: 1 Empodera cuidadanonan, 2. Prevencion den comunidad y aumento di solidaridad, 3. Baha probresa intergeneracional y sostene gruponan vulnerabel y 4. Yuda organisacion bira mas fuerte y alinea cu necesidad den comunidad. Sr. Tecklenborg, Director di CEDE ARUBA a duna un splicacion di e trabou di CEDE ARUBA den cada pilar y e posibel sosten pa organisacionnan.
Na e di dos parti di e evento tabata tin diferente workshops, esta informacion tocante procedura y aplicacion pa fondo di Samenwerkende Fondsen Cariben, splicacion tocante e programa di boluntarismo nobo www.arubavolunteers.org y splicacion tocante programanan di Erasmus Plus y European Solidarity Corps pa stimula trabou boluntario internacional di adultonan hoben.
CEDE ARUBA ta wak bek ariba un bon atendi apesar di e mal tempo cu tabata tin y ta gradici tur organisacion y iniciativa pa nan interes.
