(LaPatilla) – Den e recien desaroyo entorno posible reanudacion di negociacion entre gobierno Chavista y oposicion, a surgi e tema di e orden di captura Mericano contra Maduro, y e 15 miyon dollar di recompensa pa duna informacion cu por conduci na detencion di e lider Chavista, cu Merca no ta reconoce como presidente legitimo.
Aparentemente awor oposicion ta dispuesto pa discuti acuerdo encuanto flexibilizacion di e sancionnan economico, mihor condicion pa eleccion y pacto di convivencia, pero no ta mustra dispuesto di papia na mesun nivel di un eventual revocacion di e orden di captura y enhuiciamento di Maduro.
Tabata presidente Colombiano, Gustavo Petro, ken lo a propone e idea despues di participa na un reunion priva na Paris cu delegacion di Chavismo y oposicion, y presidente di Argentina y Francia, como tambe canciyer di Noruega, pais garante di e dialogo. Segun e mandatario Colombiano, Estadonan Uni “tin algun variable pa considera” pa fomenta acuerdo politico na Venezuela y ta esun cu, segun Petro, lo mester rectifica e procedimentonan contra Maduro, cu vista riba eleccion presidencial husto na 2024.
“Con por tene eleccion liber si tin un premio riba cabez di miyones di dollar pa nan mata bo?,” e presidente Colombiano a reclama. Petro a propone tambe un amnistia general y un “desbloqueo” di economia Venezolano.
E recompensa a keda anuncia na 2020, dos luna despues cu Merca y 50 otro pais a nenga di reconoce Maduro como presidente legitimo. Pero e no tabata un gesto politico so, pasobra husticia Mericano a cana e caminda di prepara un proceso penal contra Maduro, basa riba delito di narcoterorismo, corupcion, trafico di droga y otro cargo criminal.
Remarcable ta cu recientemente Merca a laga e dos sobrinonan di Celia Flores, esposa di Maduro, den libertad a cambio di libertad pa e ciudadanonan Mericano di Citgo cu tabatin algun aña preso na Venezuela. Sin embargo, e acusacionnan contra Maduro a keda, pero por ta un punto di debate si yega na negociacion entre gobierno Chavista y oposicion.
