A entrega nota di cambio di presupuesto 2023 na Parlamento di Aruba

Den siman di tratamento di presupuesto 2023, a trece dilanti diferente topico y opinion tanto di parlamentario como di minister, unda ayera mainta minister di Finanzas y Cultura Xiomara Maduro a presenta e nota di cambio na Parlamento di Aruba.

Di esaki, minister Maduro den su disertacion a duna un bista loke ta trata e nota di cambio unda el a menciona cu e gastonan di producto y servicio di 2.217 miyon florin e ta bira 2.205 miyon florin, e gasto di interes ta keda mesun cos cu 250 miyon florin, gastonan di subsidio tambe ta keda igual cu 214 miyon florin, gastonan di impuesto directo ta subi unda cu tabata 468 miyon florin y awor e ta bira 477 miyon florin.

Lo cual ta entrada di impuesto indirecto ta subi di 684 miyon florin pa 715 miyon florin, lo cual ta inversion ta keda igual cu 20%, fiansa pa estudio tambe ta keda mesun cos cu 26 miyon florin y lo cual ta gasto di personal a subi di 459 pa 460 miyon florin.

E necesidad financiero ta baha di 1.414 miyon e ta bira 1.325 miyon florin y loke ta e saldo financiero di pais Aruba, e deficit cu tabata di 25 miyon florin ekivalente na 0.4% di e GDP, esaki e ora ey ta bira un surplus di 1% di e GDP lo cual ta 63 miyon florin.

Pa lo cual ta trata entrada, el a splica cu esey ta subi di 1.532 miyon florin pa 1.607 miyon florin y e gastonan di pais Aruba ta baha di 1.557 miyon florin e ta bira 1.544 miyon florin.

Esaki ta e splicacion di e nota di cambio manera minister Maduro a presenta ayera den parlamento, den un presupuesto cu su mesun persona ta considera cu ta uno historico pa motibo cu “nos a brinda tur respet cu por tin na parlamento y tambe na nos leynan, caminda nos a entrega esaki despues di 15 aña na ora”.

Asina mes, el a indica cu ta importante pa comunidad di Aruba por conoce e entradanan caminda cu ta duna un balansa cu ta bay den e parti di surplus y cu ta hopi necesario pa un pais manera Aruba cu pa largo tempo ta conoce un situacion di debe grandi y di cual den pandemia tambe nan mester a traha un debe pa por percura cu awendia Aruba por ta caminda e ta, e ultimo surplus tabata na aña 2019.

“Hopi hende ta lubida e panorama cu nos tin y cu nos ta mira tur dia ora nos sali for di nos cas pero tambe paden di nos hogar. Lo por tabata uno hopi diferente si no a tuma accion den e situacion di pandemia y tambe Sr. presidente nos tin cu percura pa Aruba tambe como pais y como gobierno haya su fair share y no lubida fondonan cu gobierno ta atende cu nan, ta fondonan publico”, el a declara.

Despues di tres aña di a conoce deficit grandi produci pa pandemia di Covid-19 minister Maduro a indica cu nan a percura pa yega na un situacion di surplus caminda cu nan ta espera cu nan por haya tambe e trankilidad necesario pa nan por goberna e pais pa bienestar di tur.

Esaki tambe tabata e aña unda cu el a sigura cu nan a pasa den hopi turbulencia entre otro, loke ta tabata trata un anwizing.

Den su opinion, e ta sinti dolor cu den un banda di parlamento ta asumi nan responsabilidad pa cual pueblo a pone nan eynan, “esaki ta nos trabou sr presidente, nos a wordo scogi pa pueblo, pa nos por ta awe akiden, pa trata e ley di mas importante di pais Aruba cual ta e presupuesto di bo pais, nos por tin diferencia di opinion ariba lo cual ta e contenido di e presupuesto, kisas por tin diferencia di opinion riba e maneho cu ta wordo hiba, algun faceta di dje, pero Sr. presidente si como parlamentario awe bo no ta den sala di parlamento, e ta un falta di respet pa bo pueblo, pasobra nan a scoge bo pa bo ta akiden pa bo por ta den e discusion aki y trece nan opinion dilanti pa lago por wordo haci cune”, minister Maduro a señala.

Igualmente el a sigura cu oposicion cu no tabata presente den dianan aki ora ta papiando di presupuesto 2023 na Parlamento di Aruba, “nan no tin amor pa e pida di baranca aki y cu nan tin otro ideanan pero cu nos a mira den e siman aki cu sigur ayera ora nos a tende fiscal papia riba e caso di un parlamentario di pais Aruba envolvi, e ora ey mi por compronde e pensamento, pero e ta keda na cada hende nan consenshi di con nan kier mira mundo”, el a sigura.

Entrada ta aumenta debi na crecemento economico

E Nota di Cambio ta contene e siguiente cambionan: Basa riba e ultimo pronostico di e ‘Economic Outlook’ di Departamento di Economia, lo adapta e entradanan na e crecemento economico di 6,8%. Compara cu locual a keda entrega na Parlamento anteriormente, ta un subida di 1,7% riba e 5,1% cu a wordo uza anteriormente. Esaki lo trece un entrada adicional di 57 miyon florin.

Introduccion di BBO/BAVP/BAZV na frontera

Pa crea un ‘level playing field’ y teniendo cuenta cu e ineficiencia economico creciente, lo introduci cobransa di BBO/BAVP/BAZV na momento di importa producto (handelsgoederen) na Aruba. E BBO na frontera aki ta premira di drenta na vigor 1 di juni 2023 y lo trece un entrada di 15 miyon florin.

Introduccion di ‘Fondo pa Resiliencia y Innovacion’

E pandemia tabata tin un impacto serio riba e finanzas publico y tambe riba e salubridad di nos Pais. Pa por ta bon prepara pa un otro eventualidad, ta introduci un cobransa di 15 dollar na cada bishitante di nos Pais cu lo bay den e ‘Fondo pa Resiliencia y Innovacion’. E cobransa aki lo bin na luga di e ‘Aruba Travel Insurance’, di e entrada aki, 35% lo keda den e fondo y 65% lo bay den caha di pais Aruba. Pa aña ta premira di haya 25 miyon florin.