Lider partido Curpa, Eric Ras: Aruba ta den agonia y gobierno ta sigui malgasta placa cu no tin

Nos ta bibando den tempo cu nos ta yama bon malo y esaki ta e tempo cu e toren di Babel lo cay den otro. E agenda 2030 ta nada otro cu trece mas problema social. Agenda 2030 ta un agenda comunista. No tin diferencia den metanan di desaroyo sostenibel (SDQ) y e bon comun. Dos bonchi den un baliña.

E cambio climatico tambe ta puro gañamento. Pa produci un bateria pa un auto electronico bo mester coba y saca 550 lbs di materia prima. E efecto di esaki ta devastador pa nos clima y toch ta sigui promove esaki. Gobierno Hulandes kier stop agricultornan di planta y di cria bestia paso ta malo pa e clima. Den mesun rosea kier sigui kap mata haci e bosque mas chikito pa traha mas edificio na Hulanda.

Gobierno ta mas bruha cu nunca y mas tristo ta cu nan no tin solucion pa ningun problema. Gobierno aki a zink Aruba den debe. Un presupuesto 2023 sin pia sin cabes y no realistico. Hulanda ta exigencia pa e presupuesto 2023 tin un surplus di 1% cu mas of menos 65 miyon florin. Cu otro palabra gobierno mester di 200 miyon florin pa alcansa un surplus. Gobierno a keda rek tempo y malgasta placa cu no tin y awor nan lomba ta contra muraya.

Aruba su careteranan ta den hopi mal estado pio awor cu e yobida. No tin placa pa e planta di purificacion na Bubaliplas. Serlimar lo no wordo subsidia cu 3 miyon, Aruba Post NV lo no conta cu sosten financiero y tampoco Arubus. Aumento riba prijs di gasolin, aumento di ASTEC riba container di 4.9%, eigen bijdrage di AZV, aumento di BBO di 1.5%, aumento riba prijs di awa y electricidad y sin conta riba aumento di prijs di cuminda. Na cuminsamento di luna gobierno a haci asina un fanfaria cu rebaho di prijs di gasolin. Awe nan ta scondi.

Pueblo mester ta alerta riba e gobierno aki cu kier pusha e matrimonio di mesun sexo. E ley di transgender cu mester wordo trata den nos Parlamento. Nos di partido Curpa ta keda pone enfasis riba e ley aki paso e ta haci daño na nos criaturanan. Riba dje kier kita derechonan di mayornan riba educacion di nan yiunan. Si bo kier biba bo bida manera bo ta desea esey ta abo a scoge p’e pero nos yiunan gobierno no tin ningun derecho pa educa pio indoctrina. Nos no por permiti cu gobierno sigui pusha e agenda 2030 pa converti Aruba den un sodoma cu gomora y e consecuencia lo ta miseria, dolor y na final haci nos esclavo. Solamente un cambio den gobierno caminda Dios ta den e gobierno lo tin paz y prosperidad. Nos Dios nunca a perde un guera y semper lo E tin solucion.

Pueblo di Aruba nos no por spera riba ayudo for di gobierno Hulandes paso nan ta pio cu esun di nos. Gobierno Hulandes ta maltrata su mes un pueblo pero ta regala biyones na otro paisnan. No ta yuda su mesun pueblo cu no tin cuminda. Si gobierno Hulandes a laga su mes panaderianan chikito bay failliet. Ta kico lo spera nos aki na Aruba? Pueblo di Aruba nos libertad ta na peliger y nos mester lanta para pa nos derechonan.

Nos parlamentarionan ta sigui vota pa tapa malgastamento di placa di pueblo. Nan por scapa for di e husticia terenal pero nan lo no scapa for di e husticia di Dios. Pio ainda ta parlamentarionan cu ta yama nan mes cristian cu ta haci nan mes culpable na complice di maldad. Ay di esnan cu conoce e palabra di Dios pero ta bay contra Dios su principionan. Partido Curpa ta e unico cu lo keda para na banda di Dios.