(ElNacional/LaPatilla) – E nivelnan di pobreza na Venezuela a baha e aña aki pa promer vez desde 2014. Asina e encuesta Encovi 2022, realiza pa e Instituto di Investigacion Economico y Social di Universidad Catolico Andres Bello (UCAB), ta bisa. E pobreza multidimensional a pasa di 65,2% na 2021 pa 50,5% na 2022.
Luis Pedro España, sociologo y investigador di UCAB, a splica durante presentacion di e encuesta cu mehoracion di ingreso economico y empleo ta causa principal di reduccion di pobreza. E pobreza pa motibo economico a pasa di 69% na 2019 pa 58% na 2022, mientras cu pobreza pa motibo social a aumenta di 31% na 2019 pa 42% na 2022. E hogarnan sin inseguridad alimentario a pasa di 11,8% na 2020 pa 21,9% na 2022. Esaki ta implica cu tin menos famia cu tin problema pa come, aunke e ta keda un minoria.
España a indica cu esaki ta demostra cu “pobreza ta cuminza di tin mas que ver cu factornan social y di infrastructura, manera vivienda, educacion y servicio, aunke e factornan economico ta sigui predominando”. El a adverti si cu a pesar di e mehoracion relativo economico, si no tin un maneho publico pa converti Venezolano den capital humano, e nivelnan di pobreza no ta sigui baha.
E estudio a atende tambe e area di trabao, den e encuesta entre 2218 hogar. E datonan ta refleha cu actividad laboral a cuminza recupera, aumentando empleo compara cu e nivel di 2019. Empleo formal a recupera y crece cu 7.7 punto porcentual durante 2022. Es decir, 56% di e Venezolanonan ta laborando pa e sector formal di economia y poco mas di 40% pa sector informal. Esaki tin relacion cu un aumento den sector priva y un mehoracion di salario, segun España. Den e hogarnan no pober, 71% ta trahando, mientras cu den e hogarnan cu pobreza solamente 45% ta laborando. E cifranan ta indica Venezuela como e pais mas desigual na mundo. E diferencia entre e hogarnan mas pober y mas rico ta di 70 vez e salario.
