Drs. Melva Croes Yánez (Neuropsicologo / Presidente Fundacion Alzheimer Aruba (F.A.A.)

Bon Dia Aruba tin algun tempo ta publica un serie di articulo cu e ayudo di Drs. Melva Croes Yanez, ken ademas di su trabao cu Fundacion Alzheimer Aruba ta un nueropsicologo. E meta di esaki ta pa yuda conscientisa comunidad tocante e experiencianan cu nos grandinan ta pasa aden y con pa nos yuda nan di e miho manera, sigurando cu nan por tin un calidad di bida conforme na loke nos tur ta merece.

A cuminsa traha riba e meta aki cu varios articulo publica anteriormente, unda cu a enfoca riba varios punto importante alabes, pa tene na cuenta ora ta papia di kico un diagnostico ta. E puntonan aki tabata importante pa compronde, mirando cu esaki ta forma e base di cualkier proceso medico sea relaciona cu Alzheimer of cualkier otro topico y tambe pa compronde kico cierto terminonan medico ta nifica y con nan ta afecta nos bida.

Anteriormente nos a trata algun punto caba manera Educacion pa profesionalnan: Cambio di mentalidad y cultura profesional, cual ta unda mester presta atencion riba e profesionalnan y e amplificacion di e educacion cu nan ta ricibi y educacion riba cultura, normanan y balornan di un cliente/pashent, pa motibo cu cultura, norma y balornan por tin un influencia riba con un pashent of cliente ta ricibi, compronde of procesa un informacion.

Den e edicion di awe, nos lo amplia e topico un poco mas, y trata algun otro puntonan cu ta importante pa tene na cuenta den e lucha cu mester cuminsa y sigui pa cu e bienestar di nos grandinan.

Kita discriminacion entre ciudadanonan cu no tin nacionalidad Hulandes/Europeo
 Hopi biaha nos grandinan por experiencia un sinnumero di discriminacion, sea pa nan edad of nan nacionalidad y/of e falta di esaki. Mester cuminsa presta hopi atencion na esaki y cuminsa tuma accion pa combati e discriminacion cu hopi di nos grandinan y hendenan en general por experiencia pa cu e falta di un nacionalidad Europeo.

Respeta protocolnan y etica di diagnostico

E ta sumamente importante pa respeta e protocol y e etica di diagnostico. E ta un tristo realidad cu no ta tur hende ta altanto di nan derecho como pashent, y hopi biaha nos ta pone un confiansa absoluto den e mediconan y e procesonan cu nan ta pone nos pasa aden.

E ta di gran importancia pa tin un respet na e protocolnan cu mester cana, y pa mantene e etica di diagnostico y conduci esaki di acuerdo di e manera cu esaki mester keda ehecuta, segun leynan, reglanan y etica cu a ser estableci caba den e sector.

Pa motibo aki ta hopi importante pa educa nos mes y nos grandinan, pa asina semper nos por tin e conocemento necesario pa sigura cu e procesonan y servicionan cu nos ta ricibi ta segun e manera corecto y di e manera etico cu esaki mester cana.

Logra un bida cu dignidad y comprension pa tur edad cu un of otro condicion neurocognitivo

Tur persona tin derecho na un bida cu dignidad sin importa si nan tin un of otro condicion, te hasta algun cu por ta neurocognitivo. E condicion cu algun persona por tin no ta cambia e balor cu e persona aki tin ni tampoco ta haci nan menos merecedor di un bida digno.

E ta responsabilidad di nos como personanan den comunidad pa sigura cu nos ta trata tur persona por igual y di un manera digno. Sinembargo, di e mesun manera aki e ta importante pa nos como comunidad den cual e personanan aki ta biba, tin comprension pa e personanan aki y di e manera aki trata nan cu pasenshi, amor y comprension.

Mester tuma accion pa sigura cu e bida di nos sernan keri y otronan cu ta den un posicion vulnerabel por continua cu un bida di e manera cu nan merece.