Nimia Alexandra Geerman ta un artista local cu ta dedica parti di su tempo na tatuahenan pero tambe e ta haya inspiracion pa pinta cuadranan y hasta sapatonan cu su mesun man pa loke el a crea su mesun marca “Bunnyhop” cu ta trata di wearable art.

For di chikito su amor pa arte a cuminsa caminda el a tuma un par di curso pa pinta y ademas su tata tabata un artista y tabata bay na Scol di Arte, su mama tabata un persona cu tabata pensa cu door cu e ta un yiu di un artista, el a nace cu e mesun talento “pero ora bo ta haci arte, e no ta algo cu bo ta nace cune, e unico talento cu bo ta nace cune ta e gana di pinta, di inverti bo tempo pa bo pinta, e ta igual cu otro personanan cu ta bira atleta of toca musica cu mester train tur dia y ta inverti tempo den dje”, el a sigura.

Geerman tabata bay na Colegio Arubano unda el a conta cu e no tabata un studiante cu por a enfoca riba vaknan como matematica, Ingles of Hulandes, e tabata gusta esunnan di obra di man y di pintamento na scol unda el a haya un par di meneer cu a dun’e su apoyo y e tabata Sali for di les di Frances of Ingles y bay na lesnan di pintamento “pasobra mi tabata echt encanta, tur loke cu tin nobo pa siña cu tin di haber cu arte mi tabata kier haci’e, si e tabata traha cu klei, pinta of cualkier cos cu tin di haber cu arte mi ta gusta inverti mi tempo pa siña den dje”, el a bisa.

Te ainda y ta sigui dedica na su tempo na esaki pa motibo cu e ta wak cu arte no ta algo pa dedik’e cierto oranan den dia y cu e por ta cualkier cos, “e por ta un cashi bieu cu algun hende ta bent’e afo, nos por transform’e den algo otro, e ta den esey y e ta den tur cos, como den con prepara un cuminda pasobra tur cos rond di nos ta arte”, Geerman a expresa.

E tabatin un deseo, cu e kier a bira artista for di chikito pero su mama tabata bisel’e cu di arte e no por a biba y cu e mester bay studia algo y eynan el a dicidi di studia pa masahista y pa hopi aña el a traha den esey.

Tambe, el a relata cu un dia un hende a bis’e cu tabatin un reunion di un meneer cu ta yama Tito Bolivar pa haci un feria “ora ma bay na e meeting cinco aña pasa ma keda encanta, esey tabata e prome biaha cu el a haci’e, mi mes no tabata sa cu kico e ta bezig cune pero bo ta bisa wow, akinan no tin mucho movecion den esey, un movecion di un hende cu ta willing pa bay extra mile cu artistanan cu tin nan grupo, pero si abo ta nobo con bo ta bay drenta den e grupo si bo no ta conoce nan, e tabata dificil pa bo drenta den cualkier grupo di arte”, el a indica.

Esey tabata e prome biaha cu el a expone su arte unda igualmente el a continua den edicion di Art Fair di fin di siman ultimo na San Nicolas siendo esey su di dos oportunidad sigurando cu el a bay hopi bon, hayando hopi interaccion di e hendenan pero pa su persona cu ta “hopi shy” manera el a sigura, e tabata algo great ora hendenan ta dun’e un comentario y unda e por a mira otro artistanan cu ta pinta muralnan, cu den su parecer e tabata algo hopi great y eynan e tabata kier yega.

Poco poco el a bay di haci cuadranan chikito na esunnan mas grandi y yega na muralnan cu tabata un logro pe “un stap pa mi por a yega na loke mi ta haci awe, cada cos tin un inspiracion di un manera cu mi por a yega na loke mi ta haciendo awor”, Geerman a bisa.

“Antes mi tabata pinta pa mi mes of mi tabata haci mural pero mi tabata haci’e pa hendenan priva y nunca mi no tabata postnan, mi tabata echt hopi shy den esey”, el a expresa.

Pa finalisa, Geerman a indica cu arte ta algo cu tur hende por desaroya y cu ta hopi importante vooral den estado mental di un hende, specialmente pa hendenan cu ta sufri di problemanan mental of cu ta sufri di depresion.

“Tin hopi cos emocional going on y mi ta bisa cu arte ta un ayudo hopi grandi, por ehemplo den mi bida mes, si mi ta sinti tristo mi ta pinta, si mi ta contento mi ta pinta, tur cos cu mi tin paden mi ta refleh’e of mi ta purba di scondel’e tras di colornan, e por ta bon, e por ta malo, si mi ta laga un hende sinti algo cu mi arte, esey pa mi ta great, bo no mester tin miedo di faya, bo ta cumpra un par di articulonan di arte y bo ta pinta bo mes, si e ta sali mahos no ta nada, next time bo ta haciel’e miho”.