(AP) – E homber ken a los tiro fatal contra John Lennon fuera di su apartamento na New York City den aña 1980 a conta un hunta cu e tabata sa cu e ta incorecto pa mata e cantante stima, sinembargo e tabata buscando fama y e tabatin “maldad” den su curason.
Mark David Chapman a haci e comentarionan aki den Augustus dilanti un hunta cu a nenga su persona libertad condicional pa di 12 biaha, citando su “egoismo cu no a balora un bida humano cu consecuencia global.” Chapman, den un relato publica pa oficialnan di e estado riba dialuna bao peticion di liertad di informacion, a bisa cu e decision pa mata Lennon tabata “mi gran respuesta pa tur cos. Mi no tabata bay ta un persona desconoci mas.”
“Mi no ta bay tira culpa riba nada otro ni ningun otro persona pa hibami na e punto ey,” Chapman a conta e hunta. “Mi tabata sa ki mi ta haciendo y mi tabata sa cu e ta un acto malo, mi tabata sa e ta incorecto pero mi tabata kier fama asina hopi cu mi tabata dispuesto na entrega tur cos y hasta kita un bida humano.”
Chapman a asesina Lennon dia 8 di december den aña 1980, mientras Lennon y Yoko Ono tabata bolbiendo back nan apartamento na Upper West Side. Anteriormente e dia aki, Lennon a firma un autografo pa Chapman riba un copia di su album recientemente publica titula “Double Fantasy.”
Chapman, ken actualmente tin 67 aña di edad, a sigui expresa na e hunta bisando “tabatin maldad den mi curason. Mi tabata kier ta un persona conoci y nada no tabata bay stop esaki.”
Chapman ta sirbiendo un sentencia di 20 aña te na henter su bida na Green Haven Correctional Facility na New York Hudson Valley. Varios biaha el a expresa cu e ta repenti di a comete e acto aki durante audiencianan pa su libertad condicional durante e añanan. “Mi a causa daño na hopi persona y si algun persona kier odiami, mi ta compronde esey,” el a expresa dia 31 di augustus.
Den nenga su libertad, e hunta a menciona cu Chapman su accion a laga “mundo recuperando for di e bashi cu el a crea.” Chapman su siguiente audiencia pa libertad condicional ta pa dia 24 di february den aña 2024.
