Evento internacional Sustainable Air Transportation na Aruba a tuma luga diadomingo ultimo na Aeropuerto Internacional Reina Betriz unda tambe por a mira e prome vuelo electrico den Caribe Hulandes den cual minister Ursell Arends tabata e prome persona cu a haci uso di e oportunidad di biaha riba e avion aki.
Den esaki, tabatin presente e 6 CEO/Managing Directornan di e aeropuertonan den Caribe Hulandes (Dutch Caribbean Cooperation of Airports (DCCA), unda nan a splica cu e meta pa esaki ta pa promove transporte aereo mas sostenibel, stabiel, cu tarifanan mas accesibel y miho conexion entre e islanan di Reino Hulandes.
E evento internacional di “Sustainable Air Transportation” ta un combinacion di un seminario y un workshop y e lo tin un duracion di 1 siman, e meta di e evento internacional aki ta pa mehora e conexionnan entre e aeropuertonan di DCCA, trece un mehoracion cu ta sostenibel y crea un red di e conectividad interinsular cu ta mas accesibel pa un y tur. E desaroyo aki tambe lo bay yuda haci impulso di crecemento economico entre e islanan den Reino Hulandes.
Igualmente, ayera mainta tabatin e prome conferencia oficial na Hotel Hyatt unda minister di Turismo Dangui Oduber a splica cu e siman aki Aruba Airport Authority conhuntamente cu Ministerio di Turismo a organisa “A Flight to the Future Convention” unda el a sigura cu esaki ta algo hopi innovativo cu un bista riba aviacion pa futuro ya cu e prome vuelo cu avion electrico a wordo haci diadomingo ultimo pa prome biaha na Aruba unda minister Ursell Arends ta esun prome cu a haya e oportunidad di experiencia esey.
Den cuadro di e vuelo aki nan a pensa cu ta hopi importante pa organisa e evento aki pa tin un bista di e vision cu Aruba tin pa cu sostenibilidad den aviacion “y nos ta sostene e vision aki, nos ta promoviendo e vision aki durante e conferencia aki, e punto central ta e sostenibilidad no solamente di aviacion pero tambe di aeropuertonan con nos tur hunto na Aruba den Reino por promove esaki” minister Oduber a sigura.
Interesante di e conferencia aki tambe ta cu nan ta bay firma un Memorandum of Understanding (MoU) entre Aruba, Corsou, Boneiro y Sint Maarten pa mehora e conectividad entre islanan, manera ta conoci na e momentonan aki tin hopi reto pa e transporte y conectividad entre e islanan, e prijs pa ticket di Aruba pa Corsou of Aruba pa Boneiro ta sumamente costoso, casi ekivalente na e prijs di un vuelo pa Miami y debi na esey no por promove hacimento di negoshi entre islanan si e prijsnan ta asina halto.
“P’esey tambe electric fly tambe ta un topico hopi actual, e ta parce un vision pa futuro pero e ta mas cerca di loke nos ta kere, ya caba nan ta desaroyando prome avionnan electrico pa entre 8 pa 12 pasahero y Aruba sigur ta posicionando su mes pa ta e prome pais den Caribe Hulandes pa tin electric fly, nos ta premira cu pa aña 2025 si e desaroyo cana segun e planning cu tin na e momentonan aki na Aruba, ta bay tin e prome avion electrico cu ta transportando pasahero pa Aruba, Corsou y Boneiro”, minister Oduber a indica.
Tambe el a informa tocante Aruba Happy One Pass cu ta un proyecto di Seamless Travel usando biometrics unda ta check in na Merca, e credencialnan ta wordo controla y verifica y ora un bes cu e turista ta yega Aruba inmigracion no lo mester haci control mas manera ta e caso na e momentonan aki, debi cu el a wordo controla caba na Merca.
