Un colaboracion entre ministerio, hava y departamento di salud publico
E tecnologia y trend di Podcasting ta uno sumamente popular na diferente pais. Den comunidad mericano por ehempel 75% di adulto ta hasi uzo di esaki, es mas cada 5 di 10 ta scucha podcast cu frecuencia. Un podcast por wordo scucha na diferente plataforma manera Facebook, YouTube y Spotify, Apple Podcast y Google Podcast.
Podcast ta un fuente di informacion cu ta wordo poni riba internet. E podcast por wordo baha (download) sea riba un computer of cualkier otro aparato. Esaki ta wordo ofrece den un documento como audio y/of audio visual. E ventaha di un podcast ta cu cada persona ta dicidi ki ora ta e momento mas ideal, ki ora nan ta bay scucha e podcast of ta scuche di nobo. Cada Podcast tin nan mesun tema y largura pa asina comparti informacion den manera innovativo, creativo y cu posibilidad di comparti facilmente ful rond mundo.
Na luna di februari ultimo a tuma lugar e lansamento di e prome podcast di audio visual di “Chasing Health”. E podcast ta brinda un variedad amplio di diferente topiconan di cuido y salud. E meta di “Chasing Health” ta pa contribui, dunando information y educacion na henter nos sociedad. Door di esaki nos sociedad ta mas mihor prepara den e lucha pa hiba un bida mas saludabel, cu ta un proceso continuo.
“Chasing Health” ta un iniciativa cu e meta pa keda informa y duna sosten na e comunidad di Aruba pa nan tin e oportunidad di tin un miho salud posibel.
“Chasing Health” a wordo crea pa yuda canalisa informacion tocante salud a base di un tema actual of uno cu no ta facil pa papia over di dje. Bou guia di host Dahariana Evertsz como seccion di Promocion di Salud na Departamento di Salud Publico, cada invitadonan den e podcast ta expertonan cu ta traha den e mundo di cuido y salud pa sinta na mesa pa comparti informacion, educa y guia abo como pashent of cliente di servicionan di cuido pa por tuma e miho desicion pa sigui busca bo salud.
Nos ta invita ful pueblo di Aruba como oyente pa sintonisa na e podcast “Chasing Health” cu ta tuma lugar tur diahuebs pa 8pm di anochi.
