(AP) – Investigacion na Africa a haya cu un solo dosis di un medicamento experimental ta proteha adultonan den contra di malaria pa por lo menos 6 luna, marcando e esfuerso mas recien den e lucha contra di e malesa plama pa sangura.

Malaria a mata mas di 620,000 persona den aña 2020 y a enferma mas di 241 miyon persona, mas tanto muchanan bao di 5 aña na Africa. World Health Organization ta den distribucion di e prome vacuna autorisa contra Malaria pa muchanan, sinembargo esaki ta solamente 30 porciento efectivo y ta rekeri 4 dosis.

E estudio nobo a test un strategia completamente diferente; Duna hende un dosis grandi di anticurpanan crea den laboratorio pa combati Malaria na luga di depende riba e sistema inmunologico pa crea e mesun cantidad di anticurpa despues di vacunacion.

“E vacuna disponibel no ta proteha suficiente hende,” Dr. Kassoum Kayentao di University of Sciences, Techniques and Technologies na Bamako, Mali, ken a yuda lidera e estudio den e barionan di Kalifabougou y Torodo a comenta.

Den e barionan aki durante e temporada di Malaria, otro investigacion a mustra, cu hendenan ta haya mordi di sanguranan infecta en averahe dos biaha pa dia. E anticurpanan experimental, desaroya pa investigadornan na U.S National institute of Health, a ser duna via inyeccion, cual ta dificil pa duna den escala grandi. Sinmbargo e resultadonan positivo a duna caminda pa un version mas facil di duna for di e mesun cientificonan cu actualmente ta den e fase di test riba baby, muchanan y adultonan.

Merca su investigacion a keda publica dialuna den New England Journal of Medicine y a ser presenta na un reunion medico den Seattle.

E anticurpa ta traha pa medio di kibra e ciclo di bida di e parasito, cual ta plama via mordi di e sangura. E ta ataka parasitonan prome cu nan drenta e higra unda nan ta crece y multiplica. El a ser desaroya for di un anticurpa tuma for di un boluntario ken a ricibi e vacuna di Malaria.

E investigacion a involucra 330 adulto na Mali kendenan a haya un of dos diferente dosis di anticurpa of un control. Tur a haci test di Malaria cada dos siman pa 24 siman. Cualkier persona cu a bira malo a ricibi tratamento.

Infeccionnan a ser detecta den un test di sanger den 20 persona ken a ricibi e dosis mas halto, 39 persona cu a ricibi un dosis mas baho, y 86 persona cu a ricibi e placebo.

E dosis mas halto tabata 88% efectivo, compara cu e placebo. E dosis mas baho tabata 75 porciento efectivo.

Proteccion por dura e varios luna di e temporada di Malaria. E idea ta pa algun dia haci uso di esaki conhuntamente cu otro metodonan manera pildonan pa Malaria, net di sangura y vacuna. E costo te ainda no ta sigur, pero un calculacion ta sugeri cu e anticurpanan por ser duna pa por lo menos 5 dollar pa mucha durante e temporada di Malaria.