Participacion activo di studiantenan den comunidad tabata topico di Congreso Nacional di Enseñansa di SKOA

Diamars ultimo den oranan di mainta Stichting Katholiek Onderwijs Aruba (SKOA) a tene su di cinco edicion di Nationale Onderwijs Congres unda cu e aña aki ta prome biaha cu docentenan di Stichting Protestants Christelijk Onderwijs Aruba (SPCOA) a participa hunto cu esun di SKOA den e congreso di enseñansa aki.

Pa cu esaki, e diferente tayernan a wordo duna na varios localidad como Hotel Hilton, Colegio San Antonio, Don Bosco, Sint Anna School, Club St. Martin, entre otro.

Anuesca Baly director general di SKOA a splica cu diamars ultimo e docentenan a haya tayernan di diferente profesionalnan di Aruba pero tambe di Hulanda caminda cu nan a haci capacitacion.

“E aña ki tambe tabata grato pa nos pasobra docentenan di SPCOA cu ta esunnan di Mon Pleisir, MAVO, Kleuter, Havo y Graf von Zinzendorf, Basis, entre otronan, tabata participando cu nos, nan ta aproximadamente entre 80 pa 90 hende cu a participa banda di nos hendenan loke ta duna un total di casi 800 docente cu a haya diferente tayer”.

E congreso aki ta algo cu SKOA ta haci tur aña y tambe nan kier sigui haciel’e pa motibo cu segun Baly a sigura, nan ta mira e balor di duna maestronan extra enseñansa banda di nan tarea di tur dia, “nos tin cu duna e hende e hermentnan pa asina nan tambe por bay den klas y por sigui haci uso di e tools cu nan a haya”, el a indica.

Tabatin diferente temanan como por ehemplo nan a invita Fundacion Respaldo pa wak con e docentenan ta maneha stress, nan tambe a invita Celina Oduber cu ta un logopedic pa docentenan di kleuter por yuda un mucha ora e tin problemanan pa papia y mayornan por busca asistencia pa su yiu, Departamento di Recurso Humano tambe tabata presente pa duna informacion tocante e landspakket y kico ta encera pa nan como docentenan pa nan tambe ta envolvi den esaki.

Door di pandemia e congreso aki a bay door online pa dos aña unda cu e aña aki nan a bay back na normalidad y nan a reuni na diferente luga.

Ademas, Carolina Thiel-Span pa prome biaha tambe a participa den congreso aki unda el a duna un tayer na docentenan di klas cinco y seis tanto di SKOA como di SPCOA tocante e participacion activo den comunidad, con maestronan por motiva esey den nan studiantenan y cua ta e areanan cu nan por enfoca riba dje pa studiantenan den klas.

Nan a dividi e tema den tres parti unda Thiel-Span a splica e parti di lo cual nan ta yama politica, esaki tin di haber cu derechonan di muchanan, como cu nan por vocifera nan mesun opinion, como nan por forma parti di gruponan na momento cu nan mester haci algo hunto pero nan no ta di acuerdo, con esey lo por mustra den klas, por ehemplo den e decisionnan cu ta wordo tuma den scol of den un klas pa incorpora e opinion di muchanan mas, pa yuda nan desaroya nan habilidad.

Na banda di esaki, tambe nan a papia riba e parti di comunidad den sentido con por involucra muchanan den un forma continuo den comunidad door di haci trabounan boluntario of proyectonan pa recauda fondonan of material pa organisacionnan, pero tambe na mesun tempo pa organisacionnan por ta envolvi cu scol y klas, el a pone como por ehemplo ora muchanan ta haci algun proyecto y companianan of organisacionnan ta duna tayernan of hermentnan pafo di lo cual nan ta siña den klas.

Tur esaki a bay den un forma di charla cu docentenan y despues a bin e parti di e maestronan mes unda diferente scenarionan y asignacion a wordo presenta unda maestronan mester a bin cu un sistema pa mustra por ehemplo, con muchanan ta bay tuma decisionnan den klas, con muchanan ta bay crea proyectonan di comunidad y na final di esaki, nan a trece dilanti un poco e parti economico.

Di esaki, Thiel-Span a menciona cu a bin dilanti con por stimula muchanan pa ta consciente di uso di placa for di un edad hoben unda awendia muchanan for di 9 aña di edad ta crea habitonan cu ta bay determina con nan ta bay cu placa y presupuesto pa asina por cuminsa stimula esaki den klas, tambe di diferente forma dependiendo di kico nan por haci den un klas of no pa yuda e conocemento di finanzas y economia persona

l.

Thiel-Span a informa cu den su grupo tabatin entre 82 pa 85 maestro y semper e reto di nan ta cu nan tin klasnan grandi y tempo ta limita, tin maestronan cu ta purba di desaroya y tin otronan cu no necesariamente tin e interes aki.

“Mi ta haya cu e mayoria di maestronan a participa den e actividadnan cu nos a haci pa nan y mi ta kere cu ta un topico cu nan ta interesa tambe, nan ta wak como algo positivo y pa nan haci nan lesnan mas interesante tambe na momento cu nan ta incorpora esakinan den e lesnan y definitivamente mi ta kere cu lo mester tin mas combersacion riba e topico aki pa nan nivel escolar, pa cada scol haci diferente proyectonan y actividadnan cu ta stimula e aspectonan aki na scol”, el a finalisa.