Diadomingo awor ta bay tuma luga un ‘Adoption Day’ na Fundacion Nine Lives Aruba, debi cu na e momentonan aki e fundacion ta pasando pa un momento dificil pa motibo di e cantidad di pushi cu nan tin, manera Geraldine Toro, vice-presidente di e fundacion a splica.

“Den tur e añanan nos no tabatin asina hopi pushi. Aworaki nos tin 197 pushi y un cacho. Mi no sa si ta e costo di bida cu ta subiendo of kico ta pasando, tur hende ta bezig ta bandona of ta tirando nan pushi pafo riba caya”, el a indica.

Como fundacion nan ta obliga di tuma e pushinan aki, pero cu awor a yega na un punto cu e cantidad ey no ta normal pa nan como fundacion. Debi na esaki nan ta solicita ayudo di comunidad pa acerca na un ‘Adoption Day’ pa diadomingo awor 6 di november, for di 10or di mainta te cu 3or di atardi, pa asina adopta un pushi of cacho. “Pasobra a nos no por sigui asina, gastonan ta halto door cu nan mester di cuminda, catlitter, wipes, saconan di sushi pa haci nan luga limpi tur dia y e donacionnan casi no ta drentando”, Toro a expresa.

Den su opinion, e ta kere cu door di e situacion mundial cu costo di bida a subi nan no ta sigui haya donacion manera antes y tin mas bestia cu mester di un ayudo.

Diadomingo durante e Adoption Day tambe nan ta bay bende mata cu boluntario a sinta planta, pa asina nan tambe por recauda fondo conhuntamente cu e adopcion di pushinan – y un cacho cu tambe nan tin, di nomber “Firulais” cu igualmente ta buscando un famia cu por adopt’e.

Campañanan di sterilisacion ta importante y tambe tin su costo, pa loke Toro a indica cu “si nos no ta educa nos hendenan cu nan mester sterilisa nan pushi of nan cacho, nos ta bay sigui cu e problema. Pasobra a nos ta sterilisando, pero por pone como ehemplo, cu m’a yuda sterilisando 20 pushi na un cas, pero dos aña despues e personanan ta pidi mi ayudo pasobra nan a tuma cuater pushi mas, pero nan no a wordo sterilisa. E pushinan ey a bolbe haya yiu. Kiermen, no ta solamente sterilisa sino educa nos hendenan pa nan sa cu si nan ta bay adopta bestia, ora cu e tin seis luna tin cu hiba e bestia pa sterilisa of castra pa nan no end up riba caya ora e doñonan no por cuida nan mas. Esey ta e problema mas grandi”, Toro a señala.

E problema aki ta birando pio, manera el a sigura, debi cu nan a ripara cu den ultimo tempo hende ta dump e pushinan pa motibo di problemanan financiero y esey no ta husto. E fundacion tin cu encarga cu e pushinan pa nan no muri riba caya of na algun caminda unda nan no ta custuma di ta.

Nine Lives Aruba Foundation ta un fundacion crea pa dos Mericano, Terry Daily hunto cu Valerie Purdy Pyeron y Toro den colaboracion cu e boluntarionan cu ta dedica pa salba e bida di pushi y cacho. Tambe nan ta promove e trato humano di e bestianan, pa preveni e crueldad y abandono.

Toro a expresa cu su fundacion so no ta e unico cu ta pasando den un mal momento. El a splica cu otro fundacionnan cu ta rescata bestia ta man yen di puppies y cacho cu hendenan tambe ta tira riba caya.

E Adoption Day aki ta bay ta ubica na Jaburibari 8B unda nan a move tres aña pasa door cu eynan nan tin mas espacio pa cuida e pushinan.

Pa adopta un pushi, e persona ta acerca e fundacion y ta yena un adoption letter cu ta costa 75 florin. Esaki ta encera e sterilisacion di e pushi door di e fundacion ora cu e tin seis luna, si ta un pushi adulto e ta sterilisa caba y tin su microchip cu tin warning. Algo cu nan ta exigi di e persona cu ta bay adopta e pushi ta cu e mester keda paden di cas, pasobra el a splica cu “nos no kier salba un pushi y despues nan ta lag’e pafo y e por bay riba caya y un auto ta bin dal e of un cacho ta mord’e y mat’e. Door di esey nos ta preferi pa e persona firma cu e pushi lo keda paden.”

Pa loke ta trata cacho, adopcion tin un costo di 200 florin pa motibo cu e castracion y sterilisacion ta mas caro. E suma ta cubri su vacuna tambe. Un di e rekisitonan mas importante pa adopta un cacho ta cu e cura di e cas unda e ta bay biba e mester ta full cera, den nan contract di fundacion e cacho no mag di ta mara na cadena sino cu e cacho mester ta los.