Recientemente, medionan di comunicacion internacional a reporta tocante e retiro di minister di Energia di Ecuador, Xavier Viera, relaciona cu un investigacion pa corupcion na Petroecuador. Esaki despues cu minister di Energia di Aruba, Glenbert Croes a anuncia cu Aruba a yega na un acuerdo cu Ecuador pa cumpra heavy fuel oil (HFO) for di Petroecuador.
Tocante e noticia di retiro di Viera, Croes a skirbi riba su pagina di Facebook: “Desagradable, pero nos ta sigui busca solucion pa nos Pais y Pueblo pa baha prijs di awa y coriente.”
Reuter’s ta reporta cu Vera a renuncia diabierna ultimo, 28 di October, memey di un investigacion riba acusacionnan cu el a regla trabao na compania estatal petrolero Petroecuador a cambio di soborno. “Mi ta tumando un stap na banda cu unico proposito di por concentra completamente riba defende e calumbia contra mi persona”, Vera a bisa, rechasando tur acusacion, den un mensahe publica riba cuenta di Twitter di ministerio di Energia.
E ex-minister a gradici presidente Guillermo Lasso pa su sosten y a bisa cu su renuncia lo evita cu gobierno ta wordo mara den e acusacionnan.
Vera tabata minister di Mineria durante dies luna y despues a nombr’e como minister di Mineria y Energia, puesto cu el a tene durante seis luna.
Riba diahuebs laat, oficina di Procurador General, cual siman pasa a bisa cu tabata lansando un investigacion, a tene inval casnan di Vera na Quito y Guayaquil y su oficina na ministerio di Energia como tambe un hotel den e capital unda otro persona involucra den e caso tabata keda.
Articulonan manera telefon y computer a keda confisca den e buskeda, y “ta bay drenta den e cadena di custodia memey di investigacion pa e crimen di soborno”, e oficina a bisa riba Twitter.
E investigacion tabata impulsa pa acusacionnan riba un medio digital cu Vera, kende a cuminsa su cargo ministerial na april, a regla puestonan di trabao na compania estatal petrolero Petroecuador a cambio di pago, entre otro acusacionnan di corupcion. El a bisa medionan di comunicacion siman pasa cu no tin prueba den su contra y cu e acusacionnan ta un esfuerso sistematico di criminalnan pa desacredita gobierno.
“Esaki ta algo orkestra pa e mafianan cu semper ta rondia mi sector, cu ta carga 30 porciento di GDP, y ami ta un piedra den nan sapato”, Vera a bisa Sonorama radio. “Esaki no ta coincidencia, esaki ta un esfuerso sistematico pa afecta e imagen di gobierno.”
Tabata dia 24 di october ultimo cu minister Glenbert Croes den un conferencia di prensa a anuncia cu “a logra e meta di por cumpra heavy fuel oil for di Ecuador”.
Durante e conferencia di prensa en cuestion, el a informa tocante e biahe cu su persona hunto cu un comision a haci pa Ecuador pa haya e oportunidad di cumpra heavy fuel oil na un prijs mas economico, e combustibel cu WEB Aruba N.V ta usa pa produccion di awa y coriente. El a indica cu intencion ta bay por baha prijs di awa y coriente na Aruba.
Den e mesun declaracion, Croes a bisa cu en bista cu nan a logra e meta aki, un delegacion di ehecutivonan di Refineria di Aruba (RDA) y FMSA den proximo dos siman lidera pa Sr. Edison Briesen como presidente comisario di RDA lo biaha pa concretisa e acuerdonan aki.
“Nos ta inmensamente contento pasobra e hecho cu nos por cumpra HFO afo na un miho prijs cu actualmente nos ta cumpra, ta brinda nos e oportunidad pa nos por baha prijs di awa y coriente, pasobra e meta ta pa e descuento wordo traduci den reduccion di prijs di awa y coriente pa henter nos comunidad”, el a bisa.
Ademas, tabatin intencion pa amplia colaboracion cu Petroecuador mas leu cu e compra directo di HFO. Croes a bisa cu Petroecuador lo tin e posibilidad pa nan por haci crudo disponibel Ecuatoriano den cuadro di e plannan di e reactivacion cu Aruba tin pa su refineria. “Nos refineria lo tin un bida tanten cu na mundo tin un posibilidad pa esey, pero mirando e interes di diferente proyectonan cu ta bay tin, como establecimento di facilidadnan di hidrogeno riba e solar refineria, esey ta bay ta e next stap pa nos”, minister Croes a enfatisa.
Mientras tanto, Croes no a haci ningun anuncio oficial tocante ki efecto e retiro di Vera tin riba e acuerdo cu Petroecuador. Su post riba Facebook ta aludi cu e acuerdo no lo bay door ya cu “ta sigui busca solucion”, pero e mandatario no a confirma esaki directamente. Tampoco tin update tocante e negociacionnan na Washington na e momento aki.
