Diamars miembro di un comunidad di Menonita di norte di Paraguay (Menonita ta un grupo di hende pacifista di movemento Cristian Ana Baptista, cu a nace na siglo XVI, como un expresion radical di reforma) a entrega cuminda na dos poblacion di indigena pober, despues cu guerilla a impone e condicion pa libera un hoben cu ta secuestra desde juli. Alberto Torres, fiscal a splica cu famia di Franz Wiebe a ricibi instruccion via un video, for di Ejercito del Pueblo Paraguayo (EPP).
Den e video, e grupo di guerrillero a compromete su mes di laga Wiebe liber riba diadomingo proximo. E condicion pa liberacion tabata relaciona cu alimento cu nan mester duna na e comunidad campesino, y cu entrega mester tin un balor di 50 mil dollar cada un. Wiebe di 17 aña a ser captura, ora cu e tabata cosecha maishi na un finca situa na colonia Riu Verde. Dia despues di e secuestro, e grupo di guerrillero a tuma contacto cu famia di e hoben y a bisa cu nan a actua robes ora cu nan a captura nan victima, pasobra e intencion tabata pa secuestra e yiu di e doño di finca, y no un trahador.
Ademas di Wiebe, EPP tin secuestra un miembro di comunidad Menonita di origen Mexicano, un polis y un doño di otro finca. Guerrilla a scoge poblacion di Antebi Cue, na norte di Asuncion y Guahory, departamento di Caaguazú , pa entrega e cuminda. E poblacion di Antebi a acepta e cargamento di cuminda y e poblacion di Guahory a rechase pasobra nan ta opina cu e carga tabata bin for un acto no honesto y violento.
E alimento cu a ser rechasa a ser entrega na indigena di etnia Mbya Guaraní, di districto di Yasy Cañy. E grupo di guerilla ta ser señala pa autoridadnan como responsabel di asesina 21 militar, 13 polis y 26 civil desde aña 2008.
