Actividad di ciclista pa conscientisa comunidad dia 6 di november

Ayera mainta IBiSA a duna un conferencia di prensa pa trece dilanti informacion tocante un Bike Ride pa conscientisa pueblo di Aruba tocante e riesgonan cu ciclistanan ta haya na e ora di training of competi riba camindanan publico.

Gelisa Angela representante y miembro di Biking Squad Aruba a splica cu fundacion aki a wordo lanta aproximadamente dos aña pasa Rubert Paesh cu e meta di salud, dal un keiro y have fun.

Awendia, nan ta casi 50 miembro di e cual tur siman e mayoria di nan ta activo unda nan ta haci nan training na diferente parti rond di e isla y door di e baisnan cu nan tin pa hopi biaha nan mester haci uso di careteranan pa por yega na e caminda cu nan tin cu yega cu ta areanan di trail of mondi.

Igualmente tin otro tipo di organisacionnan cu tambe ta practica y ta training vooral ora cu tin competencia andando, pero lamentablemente segun Angela a señala, nan ta bin ripara cu ultimo tempo tin hopi accidente na Aruba unda auto ta dal ciclista, cachonan ta sali, ataca y morde e ciclista cu consecuencianan cu dañonan ta wordo haci den e parti fisico y parti material.

Pa e motibo aki nan a bin cu e iniciativa pa tin un awareness Bike Tour Ride y pa esaki nan a acerca minister di Deporte, Endy Croes y minister Ursell Arends tocante e cachonan cu ta cana los riba caya pa traha den esaki, conhuntamente cu IBiSA, Departamento di Salud Publico (DVG) y Ministerio di Deporte nan a logra pa concretisa e actividad aki pa dia 6 di november.

“Nos ta compronde cu tin comentarionan di automobilista cu tin ciclistanan cu no ta respeta, pero nos tin cu bisa cu lamentablemente e respet cu nos no ta haya ta hopi mas grandi den parti di automobilistanan vooral na momento cu nos ta riba caminda, nan no ta duna nos espacio suficiente y bo tin cu wak pa hala full un banda pa nan no pasa dal bo y p’esey e awareness aki”, Angela a comenta.

Di parti di IBiSA, Edgar Erasmus a declara cu esaki tin e meta pa conscientisa automobilistanan pero tambe e ciclistanan ora nan ta usa e caminda, pa tur dos ta consciente di e parti di siguridad den trafico, pa nan duna otro e respet riba esaki, tambe ta pa esunnan cu tin cacho pa nan doñonan percura di tene nan cacho paden y asina nada no pasa pa e ciclista of otro hende cu ta practica cu bais of ta cana na pia.

IBiSA a yuda den e proceso di organisacion di e actividad aki cu ta bay tuma luga e dia 6 di november na ex-Bushiri Hotel for di 6or di mainta te cu 12or di merdia cu un distancia di 50 kilometer “un distancia largo y esey ta e motibo di haci esaki pa e clubnan miembro, kiermen cu e no ta bay ta open pa tur hende, solamente esunnan cu tin bais y cu por core un distancia largo, esaki ta hopi importante pa sa”, Erasmus a bisa.

Igualmente nan a dicidi e ruta largo pa motibo cu nan kier pasa den tur districto y barionan di Aruba pa por hiba e mensahe cu nan ta para pa esaki.

Nan un espacio di 500 participante for di edad di 15 aña bay ariba loke ta nifica cu ta bay ta un grupo grandi riba caminda “y pa e motibo aki nos ta pidi di parti di IBiSA pa automobilistanan tene cuenta cu e dia aki, cu un grupo grandi di ciclista ta bay ta riba caminda”, el a declara.

Ademas, el a indica cu nan a pidi un permiso pa e actividad aki, Cuerpo di Polis ta bay yuda nan y Cruz Cora tambe pa e parti di duna asistencia, cada club ta responsabel pa nan miembro, manera Erasmus a bisa, loke ta nifica cu si un di nan ta cansa, nan lo take care di esaki.

Igualmente, el a anuncia cu otro siman tin diferente videonan cu lo bay wordo publica riba diferente rednan social y website, nan lo bishita diferente radionan pa hiba e mensahe di conscientisacion pa e pueblo full un siman.

Minister di Enseñansa y Deporte, Endy Croes tambe tabata presente den e conferencia aki unda el a manifesta su nan a wordo acerca varios luna door di e lider di e grupo Biking Squad Aruba, Rubert Paesh y su directiva unda nan a conta nan historia na momento cu nan ta training y cuanto incidente ta wordo presenta, den esaki a dicidi di yama IBiSA aden pa asina organisa e actividad cu a tuma mas luna di preparacion cu nan mes a premira pa via di otro proyectonan cu ta andando caba y cu gobierno den totalidad ta carga e proyecto aki.

Tur lider di club di ciclistanan a haya un link pa nan por comparti esey entre nan miembronan unda e registracion ta caba dia 2 di november of na ora di yega na e meta di 500 participante, e inscripcion ta gratis

Di otro banda, mirando cu e actividad aki ta dirigi na miembronan di club di ciclistanan, Erasmus a informa cu IBiSA ta preparando un otro Bike Tour cu lo tuma luga 18 di november na Sports Center na San Nicolas cu un ruta mas chikito pa asina duna oportunidad na mas hende pa por participa.