Integridad hayando forma…? Pero cu tur ta cumpli…?

Cu interes nos a tuma nota di e desaroyonan riba tereno di integridad den e aparato publico. Un asunto cu lo mester a haya concretizacion hopi aña pasa caba, pero ‘mas vale tarde que nunca’. Den e edicion aki un splicacion amplio di e trabao cu e departamento nobo, Bureau Integriteit Aruba lo bay haci. Manera por observa di e splicacion, tin varios asunto cu mester haya forma ainda. Por ehemplo ta trahando ainda riba e ley cu mester dirigi e trabao y cu mester delinea tambe obligacion y derecho di cada un den e proceso aki. Na e momento aki no tin nada conoci kico e ley ta bay encera, pero ta imaginable kico ta asunto cu en todo caso lo mester ta aden. Den e entrevista ta dedica atencion, corectamente, na e importancia di mantene secreto e identidad di e denunciante, y ta señala tambe cu sigur den servicionan chikito ta dificil pa mantene esaki.

Pero den practica esaki ta bay mas leu ainda. Por ehemplo: con pa atende caso di no integridad cu un empleado publico ta observa, cu tin e complicacion cu ta trata di un asunto di violacion di algun ley o reglamento di trabao, cu e persona a trece caba na conocimento di su superior(nan) pero ta observa cu nada ta ser haci cu e denuncia. Si den un caso asina e persona hiba e asunto pa e persona di confianza, cualkier accion di e departamento di integridad, sea ta haci averiguacion personalmente, o ta pasa esaki pa un investigador, inmediatamente lo ta conoci ta ken ta e persona cu a haci e denuncia. Y ta aki unda inmediatamente por spera accion di intimidacion o represaya, pasobra e persona(nan) na ken el a raporta, ta su superiornan.

Pa ilustra con den practica e asuntonan aki ta resulta, seguidamente un caso berdadero di un ambtenaar cu a haci su trabao, pero a topa cu resistencia di su hefenan pa raporta na Ministerio Publico. Tabata trata di un persona cu den su trabao a bin topa cu un agente policial cu den su tempo liber tabata yuda un amigo comerciante pa personanan di exterior cu ta traha na e empresa, por a drenta y sali sin problema na Inmigracion. E persona como ambtenaar corecto a traha un rapport pero despues di entrega a ripara cu tanto su hefe directo como e director no tabatin mucho gana pa atende e asunto. Via un colega na ken e persona a puntra conseho, e asunto a bay Ministerio Publico y a resulta den un caso penal. So far, so good, bo por bisa pasobra e trabao no a ser haci en vano. E problema sin embargo tabata cu e persona no por a haci nada bon mas pa su superiornan, no tabatin un ambiente propicio pa traha aden, y via ayudo di otronan e por a bay otro departamento. Claro cu e asunto di e hefe y e director no integro nunca a ser trata ni huzga, mucho menos a tuma accion disciplinario contra nan.

Kico nos kier trece dilanti aki? Cu den practica ta hopi dificil pa actua contra intimidacion o represaya contra e persona cu denuncia, pasobra den practica tin hopi manera pa encubri e accion tuma contra e persona, alegando por ehemplo cu su trabao no ta na e nivel requeri, pa despues acusa e persona di no ta cumpli y no ta recomenda e persona pa promocion, por ehemplo. Y no bisa cu e cosnan aki no sa pasa, nan t’ey grandemente, tur dia, tur aña. Tin mil y un manera pa haci bida di un colega imposible.

Otro aspecto cu merece atencion, cu no necesariamente mester ta regla den e ley special pa integridad, ta e manera con ta obliga cada departamento pa elabora e mecanismonan di control riba diferente obligacion y prohibicion cu ta describi caba den LMA, pero di cual no ta conoci si e departamento tin proceso standard pa controla y sanciona esakinan. Nos ta referi por ehemplo na e prohibicion di ‘nevenarbeid’, a menos cu e persona tin permiso oficial. Nos ta sigur cu no ta na tur departamento tin un control regular riba e asunto aki. Tambe nos tin e aspecto di tuma regalo, cu na cierto departamento tabata, y por ta ainda, un desastre completo. Ley (LMA art. 61) ta bisa cu un ambtenaar tin e obligacion pa notifica su ministro inmediatamente ora un persona trata di laga e ambtenaar haci o keda sin haci algo, cu un regalo o promesa di recompensa. Nos no ta kere cu tin hopi cu a cumpli cu nan deber di notifica e mandatario…

Por ultimo, mester mustra riba e importancia di superiornan integro. Esaki no ta asunto solamente di hefe y director, sino tambe di mandatario, y di e personanan cu ta traha den nan despacho. Cu ki cara ta exigi integridad di empleado publico, si por ehemplo personanan enhuicia y encarcela, cu strafblad anto, ta traha den despacho di un mandatario…? Si di berdad e ministro den tal caso ta desea di duna e persona un empleo, mester ta posible pa haci esey na cierto distancia. Den pasado caba un ronda di integridad, den añanan 90, a fracasa ora un ambtenaar a haci e pregunta pakico ambtenaar mester di prueba di bon conducta, si den cierto despacho ministerial aparentemente mester di strafblad… Nos no mester repiticion di esey.