Un parti grandi di e fondo cu Banco Central di Hulanda ta traha cune tin su origen den e negoshi di sclavitud. Esaki a keda publica ayera den un nota di debate cu a bay pa Comision Fiho pa Asuntonan Interior di Tweede Kamer di Hulanda. E nota ta parti di un combersacion di mesa rondo riba e historia di sclavitud di Hulanda riba 3 di November proximo.

Manera ta conoci, Gobierno Hulandes ta discutiendo formanan pa pidi dispensa y tambe pa duna compensacion pa sclavitud na 2023. Ya caba tin un comision cu ta preparando pa ricibi reparacionnan, a base di un trabao preparatorio (e fondonan lo bay pa NGO’s).

Segun e nota cu a bay pa Tweede Kamer, Banco Central di Hulanda, DNB (De Nederlandsche Bank) tin como meta pa yega na stabilidad financiero y bienestar duradero pa tur Hulandes. E ta nifica cu tur hende mester haya e oportunidad pa participa den sociedad. Pero “DNB ta mira den e sociedad actual ainda, e formanan di racismo, abuso y discriminacion cu ta procedente di e pasado di sclavitud. Sclavitud a crea desbentahanan cu ta dificil pa sobrepasa.” Como tal, DNB a pasa ultimo periodo den un proceso di investigacion, reconocimento, pidi dispensa y reparacion.

Necesidad pa un imagen obhetivo

“Como dirigentenan di DNB, nos a realisa algun tempo pasa caba cu nos kier un imagen obhetivo di e participacion di e instituto na sclavitud. E motibo di esaki ta e atencion creciente den nos sociedad pa e lucha contra racismo y e papel cu historia di sclavitud a hunga den esaki. Na cierto momento, for di propio seno a bin gritonan pa analisa e papel di sclavitud, segun e nota na e comision fiho. DNB no por ni kier pasa riba parti di su propio historia, cu ta parti di e historia di sclavitud di Hulanda”, a bisa e Parlamentarionan Hulandes. “Pa tal motibo mes, for di Juni 2020 caba a dicidi pa laga Universidad di Leiden ehecuta un investigacion independiente (red. riba e tema).”

Resultado investigacion

E investigacion di Universidad di Leiden ta conclui cu DNB a hunga un papel den sclavitud, y cu esaki a sucede na tres manera. E placa, cu cual a lanta e instituto Hulandes, e banco central di Hulanda ta bin entre otro di sclavitud. Mas ainda, dirigentenan di e instituto tabata activo den e negoshi di sclavitud den nan bida personal. Ademas, hopi tabata defende e existencia y sobrevivencia di sclavitud. Y despues, hopi di nan a nenga di reconoce e efectonan di sclavitud. Na momento di aboli sclavitud, DNB, riba instruccion di Ministerio di Colonianan, a paga compensacion na doñonan di plantacionnan pa laga nan esclavonan liber. Entre nan tabatin dirigente di DNB.

Reconoce pasado

DNB a busca pensamento y opinion for di combersacionnan cu organisacionnan ‘grassroots,’ for di organisacionnan social, academiconan y descendientenan di personanan cu tabata esclavo, pa forma su pensamento. Tambe a lanta un grupo externo cu ta consisti di personanan cu tin un stem importante den e debate actual riba historia di sclavitud. E gremio aki a fungi como un ‘sounding board’ of grupo di resonancia pa yega na un pensamento di DNB. For di e combersacionnan aki a bin dilanti cu reconoce e sufrimento y pidi despensa ta esencial pa por procesa e historia aki na un forma beneficioso. Como tal, ta esencial pa sigui cu esaki, pa tur hende cu ta carga e consecuencia di e pasado di sclavitud.

Dispensa

Ya na Juli, DNB a pidi despensa na tur descendiente di personanan cu tabata esclavo na Hulanda, Surnam, Boneiro, St. Eustatius, Saba, St. Maarten, Corsou y Aruba. A pidi dispensa na tur hende cu pa motibo di escogencia personal di dirigentenan di DNB den pasado a keda limita na nan colo di cuero.

Reparacion proporcional

DNB a bisa den e nota cu ta scoge no solamente pa palabra, sino tambe hecho. Ta pa tal motibo ta scoge pa pasonan cu ta cuadra den su papel den comunidad y cu mester tin balor pa personanan cu te dia di awe ta experiencia e consecuencianan di sclavitud. E medidanan mester ta apropia, cu nificacion y proporcional. DNB como ta no a scoge explicitamente pa pago di compensacion financiero pa e daño di pasado. Un decision di compensacion no ta keda na e instituto pero ta uno di Gobierno di Hulanda. Cumpli cu e pasonan di otro banda ta rekeri pa ta concreto y transparente. E instituto a bisa cu pa tal motibo mes a pone obhetivonan concreto pa su mes. Algun ta paso pa un solo biaha, cu ta dirigi na amplia e conscientisacion y conocemento di e pasado comparti di sclavitud. A crea tambe un fondo pa mitiga e efectonan continuo di e pasado aki.

Asina a pone fondo pa proyectonan cu tin impacto directo riba bida diario di esnan afecta, por ehempel riba tereno di enseñansa, cuido di salud y conocemento. DNB lo pone 500 mil euro tur aña pa e siguiente 10 añanan. Banda di esaki, DNB lo pone 5 miyon euro disponibel pa contribucion di un biaha, cu mester bay na iniciativanan di caracter educativo, manera e museo nacional di sclavitud y e centro di conocemento cu ta forma parti di dje.

Tambe DNB ta fortifica su propio organisacion pa bira mas diverso y inclusivo, pa medio di entre otro enfoca riba diversificacion den su personal, den seleccion di empleado, promocion y hasta stagiairenan. Mas ainda, DNB lo comparti publicamente su papel den e pasado di sclavitud den su edificio renoba na Frederiksplein, Hulanda. Lo haci esaki cu exposicion di arte, cu mester bira mas diverso y inclusivo. Tambe lo sigui cu e investigacion historico. E instituto a bisa di lo responsabilisa tur e pasonan aki den su relato anual.

A tuma e prome pasonan caba pa duna e medidanan contenido. Pa loke ta e fondo, ta trahando riba strategia y metanan awor aki, mientras cu ta trahando riba e cuadronan pa determina cua proyecto lo cay den nan. Ta den combersacion cu diferente experto riba fondonan pa mira con ta hinca e organisacion den otro. “Nos lo keda den combersacion cu e actornan envolvi,” e nota ta bisa.

Pero internamente tambe a tuma paso caba. DNB a nombra su ‘Chief Diversity Officer,’ y tin combersacionnan riba tur nivel pa mira con por mehora e diversificacion den e organisacion. E sede oficial na Frederiksplein ta den renobacion, pero gran parti di e edificio lo ta accesibel pa publico. Unabes cu e renobacion ta cla lo tin un seccion dedica na e pasado di sclavitud.