Ta importante pa realisa kico ta e palabracion haci den Conseho di Ministernan di Reino diabierna ultimo. A reitera e palabracion cu den 2023 lo tin un surplus di 1% pa loke ta presupuesto di Pais Aruba. Pa logra esey tin dos manera, of gobierno ta baha gasto of ta aumenta su entrada.

Gobierno di Aruba no kier baha gasto, kiermen mester aumenta su entrada pa medio di belasting, kiermen mas medida. Gobierno por a hisa su entrada tambe dor di bin cu un pilar economico nobo.

Minister di Finanzas, Xiomara Maduro, tabata dispone di e siguiente rapport traha pa un experto di Hulanda: Productie van Medicinaal Cannabis Aruba, Financiele Impact op de Begroting, di 5 di december 2019. E rapport ta bisa cu e ta asina prometedor pa Aruba e pilar economico nobo aki, cu e ta recomenda cu mester bay over na accion rapido. E conclusion ta cu e ta soluciona e problema di presupuesto di Pais Aruba. Kiermen no tabata necesario pa bin cu e aumento di BBO si a ehecuta e rapport aki. Esaki ademas ta kapitaalvernietiging door di Minister Maduro, e rapport aki a costa placa y no a haci nada cune.

Oportunidad grandi a bay perdi, lesa esaki den e rapport: “Indien snel wordt overgegaan tot productie van cannabis olie komen er ruimschoots middelen ter beschikking”.

Pero tambe ta adverti cu si no actua corectamente inversionistanan lo bay na otro pais pa produci cannabis, y ta menciona Panama, Colombia, Costa Rica, Corsou, y St. Maarten a bin acerca.

Hopi tristo cu ta prefera chica pueblo cu medida en bes di a produci placa pa pueblo, manera e rapport di 2019 caba ta indica. Ta p’esey minister Maduro por a bisa na 2019 den parlamento durante tratamento di e presupuesto cu e industria di cannabis lo produci mey biyon florin pa caha di gobierno. Anto awor e mesun minister aki kier bay saca e mey biyon florin cu aumento di BBO pa pueblo paga.

Mas medida ta mas sufrimento pa pueblo, pero esaki lo tin e efecto desea? MinPres a indica na augustus caba cu den 2023 lo no logra un surplus di 1%, ni den 2024. Nos tur sa cu 2025 lo tin eleccion, kiermen lubida. E lo bira te 2026, pa e siguiente gobierno.

a MinPres ta pas e lema: despues di nos e destruccion. Efectivamente, e Presupuesto 2023 entrega na Parlamento tin un deficit, y no un surplus di 1% manera palabra cu Hulanda. Un biaha mas MinPres ta mustra cu e no ta cumpli cu loke e palabra. Esey e a haci cu ReD tambe, industria di cannabis no a bin.