Den rednan social bo por a lesa cu pueblo no ta contento cu cobransa di awa y electricidad. Un aumento cu den algun ocasion lo a alcansa 100% y sin conta e eigen bijdrage riba AZV. Nos por a compronde cu boticanan ta informa prome cu prepara e remedi pasobra hopi no tin pa paga. Hopi ta esnan den necesidad cu no por paga nan eigen bijdrage y esaki lo tin consecuencianan pisa pa salud di nos pueblo.

No ta Hulanda sino ta gobierno a bisa lo baha gasto di AZV cu 60 miyon florin pa aña. Gobierno Hulandes no ta worry cu salud di su mesun pueblo, corda esun di Aruba. Informacion cu partido Curpa a ricibi cu e minister di salubridad Hulandes a malversa 5 biyon euro y no ta interesa pa duna cuenta. Asina hopi nos gobierno ta stima pueblo cu e kier deshaci di nan. Salud mental no ta importante pa gobierno pa via cu Respaldo a haya ta cera departamento y tin 18 pacient riba caya pasobra gobierno no a cumpli cu e 900 mil florin cu a priminti; pero si tin placa pa habri mas departamento cu lo costa placa. Salud di pueblo no ta importante pa gobierno.

Mientras tanto nos maestronan y dokter a dicidi di bandona Aruba pasobra den reino tin oportunidadnan pa un miho nivel di bida. A baha gasto riba overtime y a economisa riba diferente departamento di gobierno. Gobierno no ta interesa riba seguridad di nos pueblo pasobra no tin maneho ni vision. E firmamento di landspakket a habri porta pa un open border policy. Nos a mira cu e Hulandesnan poco poco ta tumando Aruba over pasobra nos gobierno a bende nos Aruba dushi tera dia 13 di November 2020 ora a firma COHO. Na departamento di finanzas tin Hulandes a cuminsa manda cobransa pa loco pa esnan cu tin negoshi. E comerciantenan mester mira con nan ta bay defende nan mes.

Hulanda mes tin hopi problema social y ta habri porta pa stranhero mientras ta maltrata e pagador di belasting y ta regala 250 biyon di euro na paisnan den sur Europa y ta hinca placa den e guera di Ucrania y ta laga su pueblo muri di hamber y di friu. Riba dje kier kita tereno di agricultornan pa traha flats pa stranhero. Esaki ta e open border policy cu nos no por acepta. E siman aki lo habri cu protesta masal na Hulanda. Francia a cuminsa cu un welga general for di 18 di October pa manda e gobierno cas. Hulanda ta na turno awor.

Si e gobierno Hulandes no ta worry cu su mesun pueblo ta kico ta spera di nos aki na Aruba. Panaderianan chikito na Hulanda a cera nan portanan pasobra nan gastonan ta mas halto cu nan entrada y gobierno Hulandes no a saca un man yuda nan. E agricultornan den escala chikito tambe ta cera nan portanan. Desempleo ta creciendo na Hulanda mientras ta spera nan un fin di aña friu y di escasez di alimento. Na scolnan ta trece insectonan pa e muchanan purba. Insectonan aki lo tin cu reemplasa e carni den futuro. Esaki ta e agenda 2030 cu Hulanda ta pusha y p’esey kier kita tereno di agricultornan pasobra segun nan pensamento un pueblo cu hamber ta facil pa domina.

Nos ta un pueblo hopi pasivo y situacion ta hopi dificil caba. E pasenshi di nos pueblo tin un limite. Partido MEP su lema di stabiel ta hopi leu for di cas. Nan mesun simpatisantenan lo saca nan pañanan sushi y tira riba caya pasobra nan ta mal rabia. Ningun gobierno cu suta pueblo cu medida lo scapa di nan desastre cometi. Nos bon Dios lo bay caba cu tur e inhusticia cu e gobierno aki a comete contra di nos pueblo. Unda ley di hende ta caba, e ley divino di Dios ta cuminsa. Esaki ta e tempo cu e huicio di Dios lo baha riba esnan cu ta comete maldad contra di pueblo.