Cana den mondi ta nifica explora e bunitesa di naturalesa di Aruba, cu nunca ta mescos. Esey ta e filosofia di ‘hiker extraordinair’ Marvin Gomez (52). Gomes ta un di e personanan cu mas ta comparti su experiencia di cana den mondi riba su isla y no ta cansa, ni di cana ni di comparti. Es mas, hasta den siman, ora cu e mester bay traha, e ta saca potret di bunitesa di naturalesa.
Marvin a lanta ta hunga den mondi. Su mayornan tabata stimul’e pa ta pafo, y e mondi rond di Tanki Flip tabata ideal. Particularmente den e temporada di yobida e tabata algo pret pa pasa aden. “E area te na unda ta awor Fantastic Gardens tabata acumula awa y tabata bira un ‘moeras.’ Esey lo mester splica tambe pakico den e area aki mata ta crece asina lihe,” Gomes a splica.
Awor aki e no ta biba mucho leu di unda el a lanta. Su cas ta na Bubali. Esey ta haci’e mas facil pa e por bay traha cu bais, ya cu su trabou ta keda den e zona turistico. Y, pa su suerte, su cas ta keda banda di un mondi. “Nos ta den un area di algun cas so. Y tras di nos cas, tin un mondi, unda area natural rondona pa cas sin cu tin pasada p’e.” Ta trata di un tereno propiedad (eigendom) cu tabata di un Mericano cu a fayece. Tabata Marvin mes cu a bay busca na kadaster pa sa mas di e tereno y e tabata contento di a haya sa e intencion di e doño di tereno tabata pa laga e tereno den su estado natural. Y su yiu muhe cu a hereda e tereno, a informa Marvin cu su intencion ta pa respeta e deseo di su tata. Algo cu pa Marvin ta ‘music to his ears.’ Pasobra a pesar di ta biba den un area hopi pobla, e ta cerca di mondi.
Asina mes, e ta busca e rooinan di Aruba tur diasabra mainta, of cualkier momento cu e por. “Mi tin como cinco aña ta ‘hike’ regularmente. Mi a cuminza cu Rudy Leysner cu te ainda tin su grupo ‘Movimento ta Bida,’ y asina a conoce hopi skina di mondi di Aruba.” Hunto cu Encho Eckmeyer di Parke Nacional Arikok nan tabata explora e naturalesa di e isla. “Ami cu mi amigonan a uni na nan pa dos aña y despues nos a dicidi pa bay riba nos mes.”
Awendia, Marvin y su amigonan ta cana cu diferente grupo, semper cla pa comparti e rutanan cu nan a descubri. Pasobra esey ta e liña cora di esnan cu ta explora mondi. Comparti experiencia bunita di locual naturalesa di Aruba ta ofrece.
“Nunca mi ta fada di cana den mondi di Aruba. E mesun ruta cu por cana awe, mañan ta diferente. E ta increibel. Por cana un caminda awe, y e siguiente siman ta bolbe, ta mira diferente cos. Ta yen di cos ta cambia.” Gomes ta conta cu e ta haya hopi comentario di otro cu ta remarca cu e unico cos cu ta mira tur ora ta cadushi y tuna, “pero no ta berdad. Nos a ripara, door di cana regularmente, cu ta mira con e rooi ta cambia, con e ambiente ta cambia. Ta un tiki awa mester cay pa mira cambio.”
Tur dia tin momento di paz
E algun minuutnan cu Marvin ta tuma pa bay di su cas pa trabou no solamente ta nifica un actividad fisico diario, pero mas cu tur cos, e ta inspir’e pa ta cla pa un bon dia. “Pa mi e ta hopi dushi, mainta, pa pasa dilanti lama.” Pero e ruta banda di lama ta nifica pasa tambe banda di Bubali Plas, cu ta rico na flora y fauna.
Hopi hende a descubri mondi y canamento den mondi durante e pandemia, pero no tur a sigui. E ta algo di compronde ya cu awor tin otro actividad, pero e ta esencial pa comunidad tin aprecio pa e naturalesa bunita y diverso cu Aruba, a di ta chikito, ta ofrece. “Tin hende cu a uni nos y de vez en cuando ta sigui uni na canamento.”
E secreto di hiking, sigur esnan cu ta pasiona, ta sinta den e hecho cu nan ta stima nan pais. “No ta un joke. Mester lanta 5’or di mainta pa por sali cana. E ta un emocion cu den tur e hikers ta conoci. Si tende con hikers pasiona ta papia, e no ta bay riba e actividad riba su mes, sino pa aprecia locual e pais unda nan ta biba tin. Tur hende cu mi conoce y ta hike cu pasion, simplemente ta stima e isla.” No obstante e ora trempan, e retonan, e momento di cana den mondi ta nifica biba den e momento y goza di locual tin rond, y esey ta e miho relahamento cu naturalesa ta brinda.
Esaki ta motibo tambe cu Gomes kende ta traha den turismo ta kere cu mester aprecia con Aruba ta y esey mester ta refleha den su arkitectura. Hotelnan cu ta diseña den un paisahe Arubiano mester complementa e mesun paisahe ey y no bira algo cu ta for di su luga. Mayoria hotel no ta traha asina, cu ta un perdida di oportunidad pa resalta. “Imagina si a traha e hotel na Seroe Colorado di un forma cu el a bira parti di e naturalesa eybanda? Ta con bunita e lo tabata?”
Turistanan di e forma aki tambe lo por aprecia Aruba mas ainda. “Hopi turista cu mi ta topa y mi tin como amigo di Facebook ta bisa mi cu nunca nan a mira Aruba manera ami ta pone riba potret.” Ta hendenan cu kizas ta bay riba tour di UTV of ta keda riba beach, y ora ta mira potretnan di Marvin ta realisa cu Aruba tin hopi mas di ofrece. Den otro palabra, hikers di Aruba no solamente ta yuda den engrandece e conocemento di e paisahe Arubiano, nan ta miho embahadornan di rikesa natural di nos pais.
