Van Huffelen: recomendacion pa aanwijzing di CAft a traha; No obstante e dificultad, Aruba mester tin surplus riba presupuesto 2023

Si no tabata pa recomendacion pa aanwijzing di CAft, deficit di Pais Aruba lo tabata mas grandi ainda. Pues den e sentido aki, e recomendacion di CAft a traha. Asina ta opinion di Secretario di Estado Alexandra van Huffelen, despues di a confirma cu Gobierno di Reino no ta duna Aruba un aanwijzing pa presupuesto 2022. Sinembargo, e Secretario di Estado a enfatisa si cu e palabracion di un porciento di surplus na 2023 ta keda vigente.

Hopi tabata pendiente e decision di Gobierno di Reino ayera, particularmente pasobra CAft, e colegio di supervision financiero a reitera su recomendacion pa aanwijzing, cu ta nifica cu Gobierno di Reino lo mester tuma cargo di presupuesto di Aruba. Motibo cu CAft a keda riba su punto di recomenda aanwijzing a pesar cu Gobierno di Aruba a reduci e deficit segun un asina yama ‘najaarsnota,’ e reduccion no tabata de acuerdo cu e recomendacionnan di e colegio.

Pero pa Gobierno di Hulanda si e reduccion di e deficit tabata suficiente, ya cu a mustra cu a haci un esfuerso pa reduci e gastonan. Aunke cu nan no ta na e nivel cu ta miho pa e ciudadano di Aruba, e ta un bon paso, Van Huffelen a mustra. “CAft tambe a haci su esfuerso pa e proceso aki.”

Den su introduccion, Van Huffelen kende ta tene un conferencia di prensa pa medio di Zoom despues di cada reunion di Gobierno di Reino, a papia di e temanan discuti, cu a cuminza cu e recomendacion di aanwijzing pa Aruba, pero tambe CAft a duna e recomendacion pasobra ta sinti cu e presupuesto no ta refleha e palabracionnan haci riba reformanan describi den e landspakket, ademas cu e deficit lo ta mucho grandi. “Nos a tene corespondencia cu Gobierno di Aruba cu segun e procedura di aanwijzing, a duna su reaccion riba e recomendacion. Aruba a haci tal. “Prome Minister Evelyn Wever Croes y mi persona, hunto cu otro miembronan di e Gabinete a tene combersacionnan y finalmente a tuma e decision pa no duna aanwijzing. E motibo principal ta cu e combersacionnan, pero tambe e hecho cu Gobierno di Aruba a adapta e presupuesto ultimo tempo. Pero ta keda un deficit, y esey nos tabata sa.” Segun Van Huffelen a spera un deficit, pa motibo cu ainda tin efecto economico di e pandemia.

Sinembargo e deficit financiero cu tin ta haci’e mas duro ainda pa cumpli cu e norma di un (1) porciento di surplus di presupuesto 2023. Manera ta conoci, Gobierno ya a entrega e presupuesto 2023 y no tin surplus registra. “Nos a mustra si cu pa 2023, Presupuesto di Aruba mester tin un surplus y e motibo principal ta pa cuminza paga e debe grandi di Pais Aruba. Esey ta necesario pasobra di otro forma, demasiado di e fondo publico ta bay pa paga interes y prestamo, cu no ta keda medionan disponible pa inverti den comunidad. Pero e ta necesario tambe pa e reformanan structural, den cuadro di e landspakket, keda ehecuta cu mester percura pa mas entrada. “Pero reduccion di gasto ta keda importante na interes di tur ciudadano.”

2023

Aruba a informa Hulanda cu no ta bay logra e surplus di un porciento na 2023, pero e Secretario di Estado ta bisa cu esey ta keda e norma y cu ta spera cu ta bay haci tur locual ta necesario pa logra. “E ta un trabou grandi, cu ta nifica cu mester traha na reforma pa logra e surplus. Mester mira con pa genera mas entrada di belasting y baha gasto publico. E palabracion di e ultimo Conseho di Minister di Reino ta cu Aruba lo tin e surplus na 2023.”

Otro palabracion ta cu e supervision ta cay bou di e Rijkswet Aruba financieel toezicht, cu ta reemplaza e ley local di supervision financiero. “No ta 2023 ainda, pues tin tempo pa traha riba e presupuesto.” E Secretario di Estado a bisa cu berdad ta cu Gobierno di Aruba y CAft no tur ora ta de acuerdo cu otro, pero esey no ta kita su confianza den e colegio, cu ta enfatisa cu mester bin e reformanan.

Berdad Aruba no a sigui cu e medidanan, manera introduccion di BTW, pero Van Huffelen ta kere cu tempo lo mustra si Aruba ta cumpli cu su palabra. “Por hala un decision aden, pero mester mira cua ta e pasonan di continuidad ta.”

Locual e Secretario di Estado a ilustra ta cu aunke cu Aruba a bin cu su ley norma Evelyn Wever Croes, e no ta segun a palabra cu Hulanda y ta mustra cu ta spera cambio di e ley y porcentahenan cu a usa. En todo caso, Van Huffelen ta tene Gobierno di Aruba na serio, pero mester concretisa palabracionnan, pa asina por tin fondo publico pa inverti den infrastructura y necesidadnan di comunidad di Aruba. “E relacion entre e paisnan y Hulanda ta basa riba un cierto falta di comfortabilidad. P’esey mes mi ta bolbe e paisnan pa papia con por optimalisa e trabou. Mester yega na un bon forma di cooperacion.”

Hulanda ta preparando si pa e combersacionnan riba e pago di e prestamo di sosten di likides, cu Aruba mester cumpli cune na October 2023. Ta trata di un suma di casi un biyon florin, cu segun e acuerdo, mester paga den un solo tiro. Durante e ultimo encuentro parlamentario di Reino, IPKO lider di fraccion di MEP drs. Tromp Lee a expresa deseo pa e prestamo aki bira un regalo. “Mi ta compronde e deseo di tur hende pa elimina e debe, pero for di perspectiva di Hulanda, nos no por indica cu esaki por. Nos lo mester papia cu otro y nos lo haci esaki tambe.”

Banda di tema di aanwijzing, RMR a discuti e contribucion di e paisnan den Caribe, como SIDS na e conferencia di clima na Egipto; e peticion di Gobierno di Corsou pa Hulanda yuda den e situacion cu KLM a reduci su vuelonan pa e isla y introduccion formal di mr. Ady Thijsen como Minister Plenipotenciario.