Aanwijzing no ta… Ni mitar di e asunto…

Mientras e asunto di un posible ‘aanwijzing’ pa gobierno di Aruba ta domina e scenario pa basta tempo caba, realmente esey no ta e asunto mayor, si nos mira loke nos tin nos dilanti mas a largo plazo. Y ta eynan nos preocupacion mester ta. Nos tin, supuestamente, acuerdonan cu Hulanda cu ta core pa un bon parti di e decada cu nos ta aden. Y realmente no tin mucho espacio pa hiba un maneho diferente, si esey lo tabata e deseo, no di e gobierno actual so, sino di cualkier cu lo mester hiba e batuta awor. Kico ta realmente e asuntonan primordial si nos trata na tira un vista aki cinco, seis aña?

Pa cuminza, nos lo mester pone atencion riba e contexto internacional di e momento aki. Nos por carga speranza cu e situacion di guera, na Ucrania actualmente, no bira un guera mas general, cu tur su consecuencianan. Esey no ta den nos man, pero e eventual consecuencianan si lo ta pa nos, manera e lo ta pa cualkier gobierno di cualkier pais. Nos por ta contento cu nos economia actualmente ta riba bon caminda, danki na recuperacion di turismo, pero kico mas nos ta haciendo pa limita e riesgo di un solo pilar economico? En realidad, nada. Y esey no pa culpa ningun hende, pasobra den mas di trinta aña practicamente nos no a mira alternativa viable bin dilanti cu por a yuda nos. Nos ta keda un isla chikito cu mester ta agradecido cu sikiera nos tin un pilar fuerte. Den e crisis di cual nos a caba di sali, tur hende, en todo caso e mayoria, tabata di acuerdo cu nos mester reforma pa por ta para mas fuerte, dia e siguiente catastrofe bin na nos porta. Di tur manera, e guia central den planificacion pa futuro ta e acuerdo cu Hulanda cu nos ta bay percura pa e reforma ey; esey ta algo cu e propio gobierno actual mes a vocifera no un, sino un sinfin di biaha.

Sin embargo, loke nos por mira haci te awor ta mustra lo contrario. Si casi tur hende ta di acuerdo den ki direccion nos mester bay, pakico tanto pleito ‘op de vierkante centimeter’ perdiendo for di vista kico ta e plan general? Nos mester cuminza supone, o sospecha, cu loke ta pasando ta cu e gobierno aki no tin plan pa ehecuta e reforma palabra, pero ta kere cu ta suficiente mustra riba recuperacion di economia, gobierno lo tin suficiente pa gasta atrobe, nos ta den ‘business as usual’… Y esey no ta asina, pasobra e siguiente crisis, di cual a papia tanto, den e situacion mundial aki por ta casi na nos porta caba. Un recesion fuerte na Merca, cu no ta algo inimaginable, por cambia tur nos plannan di desaroyo economico den e proximo añanan y hinca nos den problema cu nos lo no por resolve nos mes di ningun manera. Y asina mes nos no ta mira nada mas cu un gobierno cu ta core pa e responsabilidad di tuma rienda den e asunto aki, y haci loke mester haci.

Ta simplemente di un tristeza increible pa tende den e dianan aki un parlamentario di apoyo gubernamental gaba cu e asina yama ‘reforma fiscal’ cu gobierno lo ta implementando entrante januari 2023. Aparentemente e pober no a haya un briefing di nivel di su propio mandatario, o nos mester supone cu di berdad den e partido ey nan ta kere cu continua e BBO, y duna e ciudadano cu cartera chikito un propina cu no ta cubri mucho cos, ta algo cu por yama un reforma fiscal? Nos ta spera cu no, pero di otro banda nos a vocifera na varios momento cu e gobierno aki no tin ningun gana di introduci ningun BTW, y nos ta keda pendiente di loke ta bay sucede riba e tereno aki, mescos cu varios otro aspecto di reforma cu nos no ta mira concretiza.

Pa colmo, awor por a tuma nota di e intencion di gobierno pa pospone e famoso surplus, cu mester cuminza na 2023, pa e siguiente gobierno. Esaki ta un manera tin pa interpreta esey: nan no ta dispuesto di haci loke mester haci. Hustamente pasobra, manera bisa anteriormente, e siguiente crisis por ta den nos cara caba, ta necesario pa tuma paso awor y no aki tanto aña, y esey pa un motibo mas cu no tin nada di haci cu e posible siguiente crisis. Esey ta e realidad grandi cu, despues cu turismo ta back na unda e tabata, nos no por spera sin mas cu ta bay sigui añanan di gran bondad cu ta duna gobierno e recursonan financiero pa: 1) reduci nos debe te na un nivel razonable; 2) gasta den gobernacion sin cu mester restringi ni reforma. Y esaki mucho menos pasobra no por arte de magia e problemanan structural cu ta bira mas grave den e proximo añanan, ta bay desaparece, manera e problema di envehecimento di nos poblacion.

Kico ta anto e problema clave cu nos tin? Cu nos tin un gobierno cu ta papia bunita pero no ta haci nada pa structuralmente cambia algo. Y por si acaso kier sugeri, o insinua, cu nos ta papia mescos oposicion, laga nos pone bon cla cu nan tampoco ta dispuesto pa tuma e decisionnan clave cu mester tuma. Ta pesey nos a ‘end up’ cu supervision di Reino, toch?