E reportahe di e inspectornan di Hulanda despues nan bishita ultimo simannan ta asina negativo cu a dicidi cu Hulanda lo interveni den e inspeccion di Aruba y Corsou pa asina por tene e siguridad di aviacion riba un ‘nivel halto’.

E intervencion ta den acuerdo cu gobiernonan di Aruba y Corsou. Esaki e staatssecretaris Hulandes Sharon Dijksma, encarga cu Infrastructura y Medio Ambiente a declara durante un conferencia di prensa ayera. E paisnan Aruba, Corsou y Hulanda a yega na un acuerdo di cooperacion pa asina Hulanda lo manda inspectornan pa ambos islanan pa asina percura cu e departamentonan di inspeccion di aviacion lo traha manera ‘nos ta custuma na Hulanda’.

E motibo ta, segun sra. Dijksma, pasobra nan a constata durante e bishitanan di e inspectornan Hulandes cu tin hopi deficiencia den e departamentonan di inspeccion. E ta menciona tambe cu e situacion na Corsou ta diferente di Aruba como eynan e situacion ta ‘hopi preocupante pa cu e supervision riba e siguridad di aviacion y tambe e situacion na InselAir mes’. E echo cu Aruba si a ground casi tur avionnan di InselAir Aruba ta mustra cu akinan ‘e inspeccion si ta haci su trabou’, segun e secretario di estado Hulandes. Tin cosnan mas tanto administrativo y tambe den e sistema di supervision cu mester drecha ainda cerca e departamento Arubano, segun e. “Pero e echo ta keda cu Aruba a actua.”

Inspeccion fayando
Mientrastanto esaki no ta e caso na e departamento di Corsou. Segun sra. Dijksma e situacion na nos isla ruman ta asina cu pa falta di supervision e tabata ‘husto’ pa prohibi ambtenaarnan Hulandes pa bula cu InselAir. Den e caso aki e staatssecretaris ta bisa, cu e lo tabatin dos opcion: uza su autoridad pa yega na e segundo paso di prohibi avionnan pa bula pa Boneiro (e isla aki ta cay bou gobernacion Hulandes). “Pero esaki lo a crea un situacion hasta mas dificil. Pasobra asina bo ta kita mas conexion. Pues e ta miho pa soluciona e problema na e rais. Y esey ta na e parti di supervision cu ta fayando.” Asina e mandatario a opta pa yega na un otro solucion esta reenforsa e ekipo di e inspeccion temporalmente.

Nos a puntra e ora si e avionnan di InselAir International, esta e avionnan registra na Corsou cu ta bulando ainda, ainda por considera sigur awor cu nan a constata cu e supervision ta fayando. Sra. Dijksma ta contesta: “Mi no ta haya cu e supervision riba e avionnan ta suficiente. Asina bo no por garantisa cu ta haci tur cos posibel pa nan ta sigur. Pa motibo di esey nos a yega na e prohibicion pa e ambtenaarnan Hulandes y a anuncia esaki publicamente. Pa motibo cu nos no tabatin tur e informacion e momento ey, nos no a dicidi di yega na un prohibicion pa tur hende. Pero nos tabatin suficiente prueba si pa ta preocupa.”

Recertificacion InselAir Aruba
Pa cu Aruba e inspectornan Hulandes tambe lo yuda e departamento aki cu e recertificacion di InselAir Aruba cu na e momento aki ta un proceso andando. “Nos ta spera cu nos por yega na un conclusion positivo”, asina e secretario ta bisa. E tambe ta bisa cu gobierno di Hulanda ta hopi consciente di e rol importante di aerolineanan, cu nan ta fungi como un ‘cierto di transportacion publico’ pa e hendenan entre e islanan. “Pues e ta masha importante pa e conexionnan lo keda. Pero nan tambe mester ta sigur. P’esey nos a palabra cu pa e termino cortico nos lo yuda Corsou y Aruba drecha e supervision y nos tin tur confiansa cu lo logra esaki. Pa e termino largo nos a palabra con nos por yega na un garantia di conexionnan cu tur paisnan envolvi den Reino. Pero ma pone un cos hopi cla si: Hulanda no ta bay hinca placa den un aerolinea individual. Asina tampoco por spera un contribucion pa InselAir sobrevivi.”

Gobierno di Aruba
Den e conferencia di prensa di e secretario no tabatin representante di gobierno di Aruba ni Corsou presente. Anochi gobierno si a manda dos relato riba e bishita di sra. Dijksma. Den e esakinan gobierno niun biaha ta menciona cu Hulanda ta ‘interveni’ y tampoco riba e deficiencianan den inspeccion di Aruba.

Esaki ta un parti riba e topico aki for di un relato di parti di minister di Transporte, Mike de Meza: “Den e encuentro a elabora riba diferente tema, manera medio ambiente na Aruba, esta proyectonan cu Aruba ta trahando riba dje y e dump na Parkietenbos, pero tambe e situacion di Insel Air Aruba. Importante ta cu na final di e reunion a keda dicidi cu lo bay traha hunto riba nivel den temanan di Aviacion Civil y lo haya asistencia di Aviacion Civil di Hulanda, den preparacion di e trabounan cu mester wordo haci den cuadro di e audit cu ICAO lo haci otro aña di Aruba.”

Den e di dos relato di parti di prome minister Mike Eman, nan a hinca un citado di e secretario Hulandes eyden pero esaki tampoco no ta papia over di e situacion na e departamento di inspeccion na Aruba: “Dijksma a bisa Hulanda, Corsou y Aruba a bin ta discutiendo e asunto di Insel Air (tanto di Aruba como esun di Corsou), ya cu ta importante cu si tin problema cu esaki ta wordo resolvi mas lihe posibel. “Mi ta hopi contento di por a constata cu Prome Minister Eman ta encurasha e tipo di cooperacion pa cual tabata importante pa combersa cu ne y su colega Minister de Meza pa yega na algun palabracion.”

E relato aki ta caba cu e siguiente alinea: “Pa loke ta InselAir, esaki a bini dilanti tambe den e combersacion, aunke cu Minister de Meza ta e minister encarga cu asunto aki, pa cual e mandatario Hulandes a haya hopi placentero cu Premier Eman tabata dispuesto pa analisa loke ta importante pa tur partner envolvi. E ta un asunto fastioso, pero mester haci tur cos pa percura pa siguridad den Aviacion Civil y Hulanda ta dispuesto pa duna un man den esaki.”