E siman aki, gobiernonan di Venezuela y Hulanda a revisa e cooperacion fronterizo entre e pais Caribense y e islanan di Aruba, Bonaire y Corsou, segun minister di Relacionnan Exterior Venezolano (MPPRE) a informa.
Segun un comunicado di e ministerio, e revision a tuma lugar durante un reunion entre vice-minister di Canciyeria Venezolano pa Europa, Yvan Gil y embahador di Reino Hulandes, Robert Schuddeboom na e sede di e ministerio di Relacionnan Exterior Venezolano na Caracas.
Den e comunicado, vice-minister Gil a sigura cu e diplomaticonan a revisa relacionnan bilateral y aspectonan relaciona cu e frontera comun, pero no a ofrece mas detaye.
Gil a destaca cu ambos pais ta continua trahando riba propuestanan pa reforsa e relacion y adresa temanan global y geopolitico regional.
Dia 29 di september ultimo, presidente di Venezuela, Nicolas Maduro a duna orden pa instala basenan militar nobo riba Peninsula di Paraguana, e punto mas nort di e pais, ubica dilanti di lama di Caribe y situa apenas algun kilometer leu di Aruba, Bonaire y Corsou. E tempo ey el a sigura cu e zona aki ta “un di e rutanan di narcotrafico Colombiano pa Europa” y a urgi gobierno Hulandes pa coordina cu Venezuela pa defende e teritorio aki.
Gobierno Hulandes ni embahada di Reino Hulandes na Caracas a comenta riba e reunion.
Nota di redaccion: e articulo aki ta contene informacion di EFE.
