(AP) – Un hurado a tuma parti pa Kevin Spacey riba diahuebs den un di e demandanan unda cu a causa hopi daño na e celebridad su carera, bisando cu e no a abusa sexualmente di Anthoy Rapp, ken tabatin 14 aña den e tempo di e incidente, mientras cu ambos tabata actor cu no tabata hopi conoci den shownan den Broadway na aña 1986.
E veredicto den e huicio civil a bini cu hopi rapidez. Hurado na corte federal na New York a delibera pa un poco mas di un ora prome cu nan a dicidi cu Rapp no a comproba su acusacionnan. Ora cu a lesa e veredicto, Spacey a baha su cabes y despues a duna un brasa na su abogado. E no a papia cu reporteronan ora el a sali for di e sala.
“Nos ta hopi gradicido na e hurado pa mira e berdad door di e acusacionnan aki,” su abogado Jennifer Keller a declara. “Loque ta sigui ta cu Spacey lo ser comproba di tur loke a acusa su persona di a comete. No tabatin ningun berdad na su acusacionnan,” el a agrega, un referencia na otro acusacionnan di mal conducta den contra di e actor, incluyendo cargonan criminal na Reino Uni.
Durante e huicio, Rapp a testigua cu Spacey a invita su persona na un apartamento pa un fiesta, despues Spacey a acerca Rapp den un camber despues cu e otro invitadonan a bay for di e fiesta. El a bisa e actor, ken tabatin 26 aña e tempo aki, a carga Rapp y a drumi riba su persona riba un cama.
Rapp a testigua cu el a logra libera su mes y cu prome cu el a bay, Spacey a puntra su persona si di berdad e tabata kier a bay.
Den su testimonio, unda cu el a yora, Spacey a bisa e hurado cu e incidente aki nunca a tuma luga y cu nunca e lo a sinti attraccion pa un persona cu tin 14 aña di edad.
