(LaPatilla/EFE) – E cantidad di persona desnutri na mundo a aumenta cu 35 % na 2021 te na mas di 750 miyon y ta anticipa cu esaki ta sigui aumenta, pa e impacto di degradacion ecologico, segun un estudio difundi e siman aki.
E informe encuanto menaza ecologico, elabora pa e Instituto pa Economia y Paz (IEP) di Australia, cu dato di Lloyd’s Register Foundation World Risk Poll, a analiza cual paisnan ta core mayor riesgo di conflicto, disturbio civil y desplazamento causa pa degradacion ecologico y sucesonan relaciona cu clima. E investigadornan a examina 228 pais y teritorio, 3.638 distrito administrativo y 250 ciudad y a evalua nan capacidad pa maneha e desafionan desde awor te 2050. E informe ta destaca 27 estado -23 di nan na Africa y Medio Oriente-, hogar di 768 miyon di persona, cu ta na un “punto critico”. Entre nan ta figura, na posicion 27, Venezuela. Na promer lugar ta Burundi, sigui pa Republica Central Africano y Chad, mientras ta sigui entre otro Afganistan (9); Haiti (17); Irak (18) y Siria (20). Haiti y Venezuela ta e paisnan di continente Americano mas destaca den e ranking aki.
E estudio a revela cu por lo menos 41 pais ta enfrenta actualmente un “inseguridad alimentario grave”, cu por deteriora pa “e aumento di degradacion ecologico, inflacion y e guera entre Rusia y Ucrania”. Inseguridad alimentario ta relaciona cu “stress hidrico” – ora mas di 20 % di e poblacion no tin acceso na awa potable limpi.
Como 1.400 miyon di persona na 83 pais ta enfrenta stress hidrico, hopi di nan na Africa Subsahara, y ta anticipa cu pa 2040 varios nacion Europeo tambe lo experimenta algun tipo di presion den e sentido aki, entre nan Grecia, Italia, Hulanda y Portugal.
