Daniel ta propietario di Artpuntocom, un compania di publishing. “E tabata un comienso basta fuerte, tabata full otro mercado, full otro Aruba, dus full otro reto.” Pero mediante perseverancia y resiliencia, awo Artpuntocom ta celebrando binti aña di existencia.

Desde un edad trempan, Soto tabatin un amor y afinidad pa expresion artistico. E tabata pinta cu oleo tempo cu e tabata 13 pa 14 aña, y asina a ripara cu e tabatin un talento innato pa diseño. “Un diseñador grafico, bo por studia of bo por siña tecnica den software. Pero si bo no ta creativo, bo tin cu busca otro trabao”, Daniel ta comenta. “Bo ta bay crea un arte, dus si bo no tin e parti creativo, eigenlijk bo tin cu haci otro cos.”

E ta corda cu a cuminsa ta haci sketch exclusivo cu potlood, despues a pasa pa oleo (oil painting) y a continua cu dibuho.

“Mi ta bin di Venezuela. Mi tabatin experiencia di publishing caba, mi a traha den un frankisia di ARS Publicidad na Maracaibo.” E tabata un compania grandi, den departamento grafico so tabatin 30 hende, entre diseñador grafico, dibuhante, redactornan creativo, etc. E compania completo tabata alrededor di 150 persona. E tempo aya, ainda e proceso pa traha un aviso ainda no tabata completamente digitalisa. Daniel ta bisa cu e tabata mas o menos 50/50 entre fotomecanica, montahe y computer. “Algun parti di potret tabata sali den fotomecanica, bo ta cort’e, haci un montahe – e tempo aya tabatin un dibuhante montador, asina mi a cuminsa”, Daniel ta indica. “Bo ta haci e montahe riba un carton, corta e carton, pone un tapa, un papel transparente unda e cliente ta haci coreccion. Asina un parti tabata sali print for di computer, un parti tabata sali for di fotomecanica, y e dosnan ey e dibuhante montador ta hinca den otro y ta pone nan riba un aviso pa e por sali den corant.”

Awendia, tur e trabao individual ey –redactor creativo, director creativo, dibuhante montador, diseñador grafico, fotomecanica – awo ta practicamente den computer. Y di traha business cards y flyers, awo nan ta traha mas riba sticker, printing, car wrapping, banner.

E por corda cu a cuminsa ta haci retouching di potret antiguo. “Hende tabata trece potret di nan mama, di nan wela cu ta den mal condicion pa retouch esakinan.” Di esaki a sigui cu aviso den corant – cuminsando cu Chevrolet, Van Dorp, y hasta nan tabatin nan propio revista, Speed Magazine, na aña 2002 pa 2006. “E tabata trata di tur loke tin di haci cu auto na Aruba. Tabatin car show, drag racing, poster, informacion di mecanica, clasificado pa auto, motorsport – avion miniatura – tur esey tabatin den e revista.” Pero na final printing a bira demasiado caro y nan a stop e revista y bay back na loke semper nan tabata haci – diseño.

Tecnologia ta un parti importante den e negoshi di publishing. Daniel ta conta cu nan mester keda nan mes actualisa cu e desaroyonan tecnologico den nan industria, principalmente door di atende convencion y exponan internacional pa refresca nan conocemento y informa nan mes riba material y ekiponan nobo cu ta bira disponible. Den esakinan, miles di persona ta participa pa cera conoci cu tecnologianan internacional – manera di Italia, Asia, y Merca. Nan ta traha cu Apple – “ora nos a cuminsa e tabata Macintosh” – y Photoshop.

Ora el a bin Aruba el a busca trabao na varios compania, pero esaki no a resulta, probablemente pasobra destino tabatin otro plannan pa Daniel. “Nos a bin Aruba y mi a cuminsa cu Art. Nos a haya un cartera di cliente bon y confiable, dus nos a cuminsa eynan mas tanto cu diseño y aviso den corant.”

Daniel ta gusta e parti di diseño, ora e ta sinti su mes pa ta creativo. “Hopi hende talbes no tin e informacion corecto di un diseño, nan ta kere cu talbes e ta un mashin. E ta un producto cu bo ta traha for di nada.”

Y a pesar cu paso di tempo ta haci cu productonan ta bira cada bes menos duradero – un sticker antes tabata dura mas, e enfoke di Daniel ta keda riba duna e miho calidad na su clientenan, pa por cumpli cu nan necesidadnan. Dependiendo di e producto, na Artpuntocom por tarda y costa mas. Pero esaki ta pa motibo cu ta enfoca riba mantene un calidad halto. Esaki ta reforsa su relacion cu su clientenan, unda nan por confia cu nan ta bay ricibi un bon producto, mas duradero y miho. Y calidad ta e secreto di su exitoso 20 aña di negoshi.

“Habri un compania ta facil. Manten’e ta e arte”, Daniel ta comenta. “Mi ta kere bo mester tin hopi perseverancia, fe definitivamente, kere den loke bo ta haci, y duna un bon producto. That’s it.”