Herrick Henriquez, director di ATIA a splica cu relaciona cu e Plan di Impuesto 2023, cu a wordo presenta pa ministerio di Finanzas, nan kier trece dilanti informacion pa comunidad tocante impuestonan nobo cu ta bay implementa na aña 2023.

Manera a bira conoci, impuesto di BBO ta bayaumenta di 6% pa 7% y esey ta bay nifica den comercio un aumento di prijs. Henriquez a enfoca riba impuesto di entrada cu ta bay baha cu 2% den tur e inkomsten schaal, den cual cada nivel ta bay baha cu 2%, y tambe e belastingvrije voet cu ta e parti cu ta liber di impuesto cu ta bay subi di 28.862 pa 30.000 florin.

Henriquez a menciona cu comerciantenan ta ciudadano tambe y di nan parti tambe e ta bay afecta nan como ciudadano y nan cartera.

E belastingvrije voet cu ta subi pa 30.000 florin e ta considera cu ta algo bon, pero tambe a baha e schaal vier di 147.000 pa 90.000 florin. “E bentaha ta pa salarionan te cu 120.000 florin y esey ta bay mustra den e salario y tambe unda e desbentaha ta cuminsa tambe.”

Den un combersacion cu nan expertonan, Henriquez a señala cu nan a puntra ki diferente scalanan lo bin y ki efecto esaki ta bay tin. El a mustra un sheet di salarionan na Aruba unda un persona cu ta gana entre 2.000 pa 3.000 florin pa luna no ta bay paga impuesto. Persona cu ta gana mas di 3.000 florin pa luna, esta 36.000 florin pa aña, tin cu paga impuesto y ta bay scapa 257 florin pa aña – na 2022 e impuesto tabata 857 y pa 2023 e ta bira 600 florin.

“E ta un bentaha di berdad, pero cuanto e bentaha ta?” el a señala.

Ademas el a bisa cu esun cu ta gana 10.000 florin pa luna ta bay scapa 99 florin pa luna, e ta bisa cu e bentaha aki ta bon. Pero e desbentaha ta cuminsa cu salarionan riba 10.000 florin, pa motibo cu e ora e persona ta cay den schaal vier, unda e tin cu bay paga 50% di salario y algun di nan ta bay paga 4.626 florin mas na impuesto compara cu aña pasa.

“Nos tin cu wak si ta husto cu salarionan mas halto of no, pero un sistema husto ta cu tur hende ta bay scapa placa, esey ta un sistema husto”, Henriquez a bisa.

ATIA ta trece esaki dilanti debi cu BBO ta bay aumenta, y tur prijs ta aumentando, pero Henriquez su pregunta ta si di berdad un persona cu ta bay scapa di paga 21 florin di impuesto por ahusta su mes na e BBO cu ta bay aumenta of coriente cu tambe ta aumentando? “Esey ta importante pa nos wak. Di mes nos ta pensa cu un bentaha ta importante, nos tur kier pa tur hende su saco ta mas yen fin di luna. P’esey nos ta boga pa gobierno e ora pa baha bo gastonan, pasobra esaki por ta tambe cu nos por hinca mas placa den saco di nos ciudadanonan”, el a indica.

Pa e siman aki nan ta bay papia tocante winstbelasting cu ta e parti di e companianan, unda nan ta considera importante pa papia di loke ta e poder di compra di berdad. “Nos ta wak cu di berdad tin bentaha pa un gran mayoria, pero tambe otronan ta bay den desbentaha. Si e ta husto, esey nos ta laga na tur hende pa nan mes dicidi. Di berdad nos ta kere cu 100 florin extra den bo saco no ta bay cubri e parti di inflacion, awa cu coriente y un BBO cu ta bin na 7%”, el a comenta.

Tambe el a indica cu nan no tabata contra BTW y cu nan tabata propone esey pa motibo cu BTW tabata e manera di mas husto pa expande impuesto over di un base mas amplio. Loke nan no tabata di acuerdo ta e manera con a presenta e BTW.

“Tin diferente maneranan cu por a presenta, cu nos a sugeri tambe, pero ya nan a bin cu un BTW na cuminsamento di 6% y 18% cu den e temporada di inflacion manera nos tin aki, cosnan a cambia, tin un guera andando, prijsnan a subi. E BTW ta un miho sistema pa isla di Aruba”, Henriquez a manifesta.

Den su pensamento, loke gobierno por bay ranca riba dje por ta pa no mester aumenta e BBO mes. Tin un rapport riba cual nan como ATIA ta trahando cu otro gremio y sindicatonan, cu segun Henriquez a bisa nan ta bay presenta algun idea unda por. “Pero tin maneranan cu por genera mas entrada, por baha gasto, hisa compliance, mientras mas hende cumpli cu ley mas hende paga nan belasting y por ta esaki no mester pasa.”

Cu aumento di BBO, Henriquez ta pensa cu ta straf e personanan cu si ta pagando y cu si ta cumpliendo y no ta bay tras di esunnan cu no ta cumpliendo. “Esey ta e mensahe, bay tras di esnan cu no ta cumpli pa hisa e compliance”, Henriquez a resalta.