E tabatin apenas algun ora pa completa e pintura di Cas Ecury pa e ceremonia di develacion di e 103 cas commemorativo di KLM, pero e reto no a kita Elvis Tromp (59) for di su concentracion.

Ni cu tur e invitadonan rond di dje, combersando, haciendo pregunta a stroba e pintor den su meta, esta percura cu tin un pintura cla, pa regala Director di KLM un recuerdo pa un momento special, pa Aruba y pa KLM.

Y esnan cu conoce Elvis sa cu esaki ta e forma di traha di e pintor Arubiano, cu tin un portofolio amplio di pinturanan remarkable, mayoria di nan un refleho di paisahe y arquitectura Arubiano. Pero kizas locual ta yamativo ta cu Elvis ta un controlado di belasting den su trabou diario, aunke cu nunca tabata su intencion pa bira un specialista den belasting.

El contrario, e intencion di Tromp tabata pa studia informatica, combina cu estudio di arte. Pero, e bida tabatin otro plan p’e.

Elvis semper tabata sa cu su pasion ta den pinta. Su tata tabata traha verf di cas y tabata trece resto di verf su cas, unda su yiu homber tabatin bista riba nan riba tur e colonan, e mesclanan for di tempo cu e por corda, cu a permiti e mucha pa experimenta.

“Mi a cuminza pinta cu potlood, pero mi a cuminza usa verf ora mi tabatin siete aña,” Elvis a conta. Pakico e sa e edad ey asina cla ta danki na bisiñanan cu tabatin cuadranan di dje warda for di tempo cu e tabatin e edad ey. “Mi sa sigur en todo caso cu pa e edad ey ya mi tabata usa verf.”

Tabata su tata, un sculptor cu a stimula e creatividad di Elvis cu a cuminza bende su arte for di jong. El a bende su prome pintura tempo cu e tabatin 10 aña. “E tabata un Alto Vista. E verf no tabata ni seco, pero asina mes mi a bend’e.” Elvis mes a determina su prijs. “E tabata un prijs hopi abou. Pero difunto Julie Oduber tabata bende mi cuadranan y un di su asistentenan a bisa cu un coleccionista na Hulanda tabatin 14 pintura di mi.” Elvis no tabatin ni 15 aña.

E intencion di Elvis tabata pa spaar placa pa por a bay studia na Hulanda asina cu el a caba Colegio Arubano. Tabata su prima, kende a bin cu un carta traha caba, djis pa Elvis a firma, pa un vacatura den Gobierno. “Mi a yen’e cu e intencion cu mi ta bay traha temporario, pa despues bay studia.” Elvis a logra haya e trabou y mesora el a sigui cursonan.

Y den tres aña el a bira adjunct comies, cu normalmente ta tuma ambtenaarnan mucho mas tempo pa logra. “Tur dia despues di trabou mi tabata studia y asina mi a crece. Pa e ora ey, mi a cumpra auto y mara na otro gasto, cu a haci dificil pa bay di Aruba.” Pero asina mes Elvis a keda cu e ambicion pa sigui studia y a haya e oportunidad pa sigui un curso interno pa controlador cu Departamento di Impuesto a organisa na Universidad di Aruba, unda a busca docentenan di Hulanda. Y den e dos añanan, Elvis a specialisa den control di papel di belasting y otro area.

Como cu Elvis a studia na Aruba mes, e no a realisa su ambicion pa bay un academia di arte na Hulanda. “Pero hopi hende a bisa mi cu kizas ta bon cu mi no a bay, pasobra den un academia nan por pusha un studiante den un direccion specifico. Esey a permiti mi desaroya mi mesun tecnica.”

Si. Elvis Tromp ta autodidactico ora ta trata di su arte y su ambicion tabata pa bira un bon pintor. E mes mester a siña sum es tecnicanan cu lo por a bay mucho mas lihe si el a studia arte. Pero ta su disciplina tabata push’e pa siña tur, apesar cu e mes no tabata gusta por ehempel e tecnica impasto, cu tin hopi textura y for di e verf ta bay pa e creacion.

Elvis mes tabata gusta pinta fini mesora. “Pero despues di a practica hopi, mi a ripara cu mi a gara e tecnica y mi a gust’e. Y despues bo ta realisa cu impresionistanan tabata pinta asina ey, hopi tempo pasa caba. Pues, mi a realisa cu ma descubri algo pa mi, cu tabata existi pa hopi tempo caba.” Y e momento cu Elvis a realisa esey, ta ora cu su mesun pinturanan a haci’e corda e trabou di Impresionistanan cu na prome instante, no tabata di su gusto, pasobra e tabata gusta arte realistico.”

E bida di Elvis ta marca pa dos extremo, un trabou cu ta hopi rigido y su arte, cu ta e mes ta determina su limite. “Kizas esey ta locual ta tene mi den balans,” Elvis a comenta. “Mi a hinca hopi tempo den arte pa compensa mi trabou cu ta afecta hende.” Su speranza ta cu un dia e lo por dedica su mes completamente na su arte, unda e por afecta hende manera e kier. Mientrastanto e por conta cu un famia cu ta sostene su pasion. Su casa y yiunan sa cu den e oranan despues di trabou, Elvis ta den su studio ta pinta. Den fin di siman, e ta dedica oranan pa traha rond di cas, pero semper tin oranan reserva pa pintamento.

E trayectoria di Elvis, for di e hoben cu a siña su mes pinta, pa un di e pintornan impresionista mas aprecia na Aruba, ta sigui. Su vision pa e bida despues di pensioen for di servicio publico ta uno dedica na su arte.. Y manera cu el a pinta pa e evento di KLM, realidad ta cu Elvis Tromp unicamente lo sigui habri su halanan artistico mas ainda.