Diabierna mainta tabatin un encuentro special organisa unda a duna 100 trahado nobo un badge pa asina nan por drenta e refineria y cuminsa e trabou di preparacion pa e reapertura.
Gobierno a hinca hopi esfuerso den publicidad di e evento aki, sinembargo prensa independiente no tabata invita pa atende e encuentro. Asina Bon Dia Aruba no por a puntra entre otro kico ta e progreso riba e dump ilegal di asbest cu ainda niun departamento den gobierno a duna su atencion. E habitantenan concerni ta preparando un caso pa bay corte awor, como cu nan no ta haya oido.
Pa e 100 trahadonan nobo, nan no ta den servicio di Refineria di Aruba ( e compania estatal cu ta doño di e refineria) y tampoco den servicio di Citgo Aruba. Nan ta traha pa cuater contratista local, esta Oduber Contractors, PWEC, Doushar y Goedecke. Refineria di Aruba ta informa cu ‘ta premira den e lunanan nos dilanti lo emplea centenares di hende mas na trabou’. “Pa fin di aña lo surpasa 1000 hende trahando. Ya caba tin poco mas di 200 hende trahando den e refineria”, segun representante Francie Solognier-Croes.
Pa haci esaki lo contrata hopi trahado local, asina e compania estatal tambe a declara. Cuanto di e 100 trahado ta hende local no ta conoci. Nos no por a haya e informacion aki te awor. Gobierno y Refineria di Aruba a manda diferente relatonan, tambe minister encargo cu Labor, pero niun ta menciona esaki. Locual e mandatario di Labor si a expresa ta cu: “Aruba ta bay cera 2017 rond di 5% di desempleo.” Cual lo ta 7 punto menos compara cu 2009.
