Entrante 1 di november 2022, Fundacion Respaldo ta haya su mes obliga di cera e seccion di estadia (afdeling Verblijf) cual ta conoci popularmente como PAAZ. Esaki ta evidente den un carta manda ayera door di presidente di hunta di maneho di Respaldo.
Den e carta, na cual redaccion di Bon Dia Aruba tin acceso, ta indica cu a tuma e decision definitivo pa cera e afdeling.
Ademas, ta indica cu e ceramento di e afdeling tabata depende en parti di sosten financiero di Afl. 900,000 priminti condicionalmente pa minister di Husticia y Asunto Social, Sr. Rocco Tjon. Sinembargo, no a cumpli cu e sosten financiero aki y pues mester cera e afdeling. E decision aki ta definitivo independientemente si e fundacion ta ricibi eventualmente mas tranche di sosten financiero for di gobierno.
Otro motibo cu a conduci na e ceramento ta e recortenan cu Respaldo mester a implementa cu a conduci na un escasez inaceptable di enfermero den afdelingnan di mayor urgencia pa algun tempo caba. No por usa e enfermeronan disponible pa e afdelingnan di mayor urgencia tanten cu e afdeling Verblijf ainda ta ofrece un hogar na e clientenan.
Den e carta ta indica cu e situacion financiero di Respaldo a keda empeora durante transcurso di aña. E hunta di maneho hunto cu Management Team ta trahando internamente mediante un Plan di Recuperacion Urgente pa asina por surpasa e problemanan actual eventualmente y posicion su mes como proveedor di cuido specialisa pa salud mental.
E idea ta cu ta bay continua cu e cuido di e pashentnan aki pafo di e clinica, aunke ainda mester determina con ta bay duna forma na esaki. A pidi familiarnan di e pashentnan pa regel otro vivienda pa nan.
Informacion cu Bon Dia Aruba a ricibi ta indica cu tur pashent cu lo mester bandona e clinica ta paga parti di nan gasto mediante e hecho cu nan bijstand of pensioen ta bay directamente riba cuenta di e instancianan concerni pa nan cuido psikiatrico. Pues ta extremadamente lamentable cu a pesar cu nan mes ta contribui na e pago di nan estadia, no por continua cu e cuido necesario.
Notable ta cu recientemente den cuadro di Dia Mundial di Salud Mental a menciona cu Stichting GGZ, Fundacion Hunto pa salud mental y algun gremio mas ta atendiendo debidamente cu e cuestion di salud mental na Aruba, y cu Fundacion Respaldo tambe ta forma parti di e team di gobierno tratando e tematica aki. Awo esaki ta mustra di no ta e caso.
Bon Dia Aruba a tuma contacto por escrito cu minister di Asuntonan Social, Sr. Rocco Tjon pa pidi comentario y confirmacion riba e suceso aki. Te ciere di edicion, no a ricibi ningun contesta.
