(AP) — Robbie Coltrane, e comediante y actor kende su centenares di rol a inclui un psicologo resolviendo crimen den serie di television Cracker, y e gigante gentil Hagrid den peliculanan Harry Potter, a fayece. E tabatin 72 aña di edad.
Agente di Coltrane, Belinda Wright a bisa cu el a fayece diabierna na un hospital na su pais natal Escocia, y no a duna ningun otro detaye inmediatamente. El a yam’e “forensicamente inteligente” y “briyantemente spierto” den un di e cantidad di tributo haci na su persona.
Autor di Harry Potter, J.K. Rowling, kende algun decada atras a bisa cu Coltrane tabata su prome escogencia pa e rol di Hagrid, a tweet ayera cu e tabata “un talento increible, completamente unico”.
Naci Anthony Robert McMillan na Rutherglen, Escocia, Coltrane tabata den su 20 añanan di edad na momento cu el a cuminsa busca un carera den actuacion y a cambia su nomber den honor di musico di Jazz, John Coltrane.
E tabatin un carera notable caba riba pantaya, cu creditonan incluyendo “Mona Lisa,” “Nuns on the Run” y e adaptacion di Kenneth Branagh di “Henry V” na momento cu el a haya su break como un detective den Cracker den añanan 1990, pa cual el a gana miho actor den Premio di Academia di Television Britanico tres aña tras di otro.
El a continua den tur ocho pelicula di Harry Potter como e mentor di e mago hoben y tabatin un gran variedad di otro rol, incluyendo un hefe di mafia Ruso den thrillernan di James Bond, Golden Eye y The World is Not Enough. Mas recientemente, el a ricibi elogio pa su rol como un strea stima di television cu un secreto scur den e miniserie di 2016, National Treasure.
