E storia aki no tin di haber cu mascota of animal, si bo ta papiando specificamente di insectonan. Aunke tin hende cu tin te hasta haraña como mascota. E storia aki ta basa riba hechonan real y cu mi mes a pasa aden. Te ainda mi no por kere kico mi mes un wowonan a mira. E storia ta cuminsa asina aki.
E cas cu mi ta biba aden tin poco mondi rond di dje y aki mi ta experiencia diferente temporada; temporada di raton, temporada di lagadishi, temporada di prikichi, temporada di fruminga 5 sorto di nan y como tambe temporada di cacalaca esaki danki Dios ta un sorto so mi ta haya.
E temporada di cacalaca no ta nada pret pasobra nan ta bula rond den cas, despues di algun aña ma siña cu pa e temporada aki mi mester cera tur anochi porta y bentana di cas prome cu 8or. Un anochi durante e temporada di cacalaca mi a yega cas laat y mi tabatin hopi pensamentonan cu mi no a ripara cu ma laga e porta di entrada habri. Ma bay den baño pa cambia paña despues bay den cushina prepara un te pa relaha di e dia. Diripiente ma tende un zonido masha conoci. Tempo mi tabata mucha mi tabata pone pida plastic den e spaak di bicicleta pa e zona ora mi core cune. Masha liher ma realisa cu mi no tin bicicleta mas y cu mi tabata mi so na cas. Ma coy un basora y cuminsa rondia den cas di unda e zonido ta bin. Canando den cas cu basora den man ma ripara cu ma lubida di cera e porta di entrada, ma core bay cer’e prome cu mas cacalaca drenta.
Den e comedor ata e shon ta trankil sinta na mi muraya blanco ta warda mi yega. Ma bay dale cu e basora pero ma faya y el a bula bay cay net tras di e piano, e piano ta un “upright piano” cu mi a hereda di mi tanta. E piano ey ta hopi pisa pa mi so hal’e y como mi tin yen di pronkstuk chikito dorna riba dje mi no tabatin mucho animo tampoco pa mi sinta kita nan. Ma dicidi e ora di bay busca mi copi di te den cushina y sinta warda te ora shon cacalaca sinti bon pa sali for di e piano. Ata mi aki sinta den stoel di sala, cu basora den un man y e copi te den otro y wowonan straight riba e piano. Ma bis’e bon duro aki bo no ta sali bibo.
Un 15 minuut despues e te a caba ma pone e copi riba e mesa, y automaticamente mi a coy e remote y cende e television cu mi tin pega na e muraya. Ni un par di minuut despues ata e zonido atrobe, pero e biaha aki e tabata zona hopi duro ma lanta bay mas cerca di e piano cu e basora ainda den man y locual mi a mira mi no por a compronde e cacalaca a sali for di parti abou di e piano pero e tabata pecho ariba y bou di dje un scorpion. Curiosidad a pone mi bay mas cerca pa mira kico tabata pasando; e scorpion tabata carga e cacalaca riba su lomba y cu un forsa bent’e aproximadamente 30cm leu di dje e cacalaca a cay pecho ariba y su patanan ainda tabata move y e scorpion a cuminsa troce den otro djey el a bira marcha bay bek bou di e piano.
Ma probecha di dal mata e cacalaca y bent’e afor, y ma cuminsa hari den mi mes y bisa niun hende lo kere mi si mi conta e storia aki cu ni un scorpion gusta un cacalaca invadi su cas. Mañan mi lo busca un pest control bin spuit pasobra ya mi no por cu e situacion aki.
