(AP) – Cientificonan a transplanta celula di cerebro humano den e cerebro di raton baby, unda e celulanan a crece y forma conexionnan. E ta parti di un esfuerzo pa studia desaroyo di e cerebro humano y malesanan cu ta afecta e organonan mas compleho, cual ta haci nos ken nos ta pero tin hopi tempo siendo un misterio.
“Varios desorden manera autismo y schizofrenia ta probablemente un malesa cu ta unicamente humano” pero “e cerebro humano ciertamente no ta hopi accesibel,” dokter Sergiu Pasca, autoridad di un estudio cu ta describi e trabao, a publica den Nature Journal.
Metodonan cu no ta involucra saca parti di e cerebro humano “ta metodonan cu ta prometedor pa combati e condicionnan aki.”
E investigacion ta continua cu e ekipo su trabao anterior creando ‘organoid’ di cerebro, cual ta structuranan chikito cu ta representa organonan humano cu tambe ta ser usa pa representa entre otro higra, prostata of partinan clave di esaki.
Pa haci ‘organoid’ di cerebro, Stanford University su cientificonan a transforma celulanan humano di cuero den stam cel y despues a yuda esaki bira varios tipo di celula di cerebro. E celulanan aki eora a multiplica y crea ‘organoid’ cu ta representa e cortex cerebral, cual ta e capa mas pafo di e cerebro y ta hunga un rol clave den areanan manera memoria, pensamento, siñamento, rasonamento y emocionnan.
Cientificonan a transplanta e ‘organoid’ nan aki den raton baby di 2 pa 3 dia di naci, cual ta un etapa unda e conexionnan den e cerebro te ainda ta formando. E ‘organoid’ nan a crece di tal manera cu nan a ocupa un tercer parti di e raton su cerebro unda cu nan a ser implanta. Neuronanan di e ‘organoid’ a forma conexionnan cu e circuitonan den e cerebro.
Neuronanan humano a ser transplanta den ratonnan anteriormente, sinembargo esaki generalmente ta tuma luga den bestianan adulto, usualmente djaca. Pasca, un profesor psikiatrico na Standford School of Medicine a bisa cu esaki ta e prome biaha cu a pone e ‘organoid’ aki den e cerebro di raton baby, creando “e circuito di cerebro humano for di celula di cuero humano y e demonstracion cu ta implanta neurona humano por influencia e bestia su comportamento.”
Pa examina e uso practico di e metodo aki, e cientificonan a transplanta ‘organoid’ den ambos banda di e raton su cerebro. Uno genera for di un persona saludabel y otro for di un persona cu tin e sindrome Timothy, un condicion genetico raro cu ta asocia cu problemanan di curason y autismo.
