(BBC) – Diaranson ultimo Merca a anuncia medidanan nobo pa controla e migracion Venezolano, un programa cu ta duna status legal pa dos aña na esunnan cu ta yega cu avion y e expulsion inmediato na esunnan cu ta crusa e frontera di manera iregular via Mexico.
Departamento di Seguridad Nacional (DHS siglanan na Ingles) a informa e creacion di un alivio nobo pa Venezolanonan, similar na esun cu ta existi caba pa ciudadanonan di Ucrania, cu ta concede un status temporal di dos aña na esunnan cu ta dispone di un patrocinado na Merca.
Den paralelo, DHS ta bay debolbe pa Mexico e mayoria di Venezolanonan cu lo wordo intercepta despues di crusa e frontera sur, e expulsion ta bay tuma luga bao e titulo 42, un norma di salud publico implementa for di comienso di pandemia y cu a wordo hereda di Administracion di ex-presidente Donald Trump (2017-2021).
E medidanan tin e obhetivo di “reduci e number di personanan cu ta yega na frontera” di manera iregular y crea procesonan migratorio “mas ordena pa Venezolanonan cu ta huy di e crisis humanitario y economico di nan pais” un funcionario di e gobierno Mericano a señala.
Pa via di e programa comunitario aki, gobierno Mericano ta bay acepta solamente 24.000 persona for di comienso.
Den bispo di dialogo di halto nivel di Siguridad entre Mexico y Merca, gobiernonan di Andres Manuel Lopez Obrador y di Joe Biden a acorda un skema a traves di e cual gobierno Mexicano ta bay ricibi migrantenan deporta di Merca mediante e Titulo 42, a cambio di esey, Washington ta bay emiti 65 mil visa di trabao temporal na unda cu 20.000 ta bay wordo destina pa personanan di Centro America y Haiti, bao e condicion cu nan beneficiario lo biaha na e pais bisiña via aereo sin pasa via frontera nort di Mexico. Segun e acuerdo, cu a bira conoci diaranson ultimo pa Canciyeria, Secretaria di Gobernacion y Instituto Nacional di Migracion (INM) Mexico ta bay permiti di manera temporal cu algun personanan di nacionalidad Venezolano por drenta na teritorio Mexicano via frontera nort.
Den e programa di visa cu a cuminsa ayera, ta aplica solamente pa personanan Venezolano cu a yega na Mexico prome cu dia 12 di october, esunnan cu lo drenta despues di e dia ey no lo por presenta nan solicitud for di Mexico.
