(DiarioLibre) – Segun Unicef, e fondo di Nacionnan Uni encarga cu asunto di infancia, 65 % di e adolescentenan embaraza na Republica Dominicana a sufri violencia sexual.
Ta trata aki di e adolescentenan entre 15 y 17 aña, cu a sufri violencia sexual na algun momento di nan bida, segun un informe presenta pa Unicef. E documento ta precisa cu, den mayoria di caso, e perpetradornan di e crimennan ey ta cerca di e muchanan: na nan cas, scol, famia, cual ta e lugarnan considera pa e organizacion como “espacio insigur”.
Tambe ta señala cu, di acuerdo cu datonan di e encuesta Enhogar dI 2019, un di e hallazgonan mas preocupante ta cu 2 % di e muhernan jong a haya yiu promer di cumpli 15 aña, y cu bao di e cifranan frecuente ey por tin scondi situacion di abuso, di incesto y di violencia sexual.
E encuesta ta añadi cu 20 % di e muhernan hoben ta haya nan promer yiu promer cu nan yega na 18 aña. Den e investigacion, e cifranan ta aumenta te 34 % entre esnan mas vulnerable y te 49 % entre esnan cu solamente ta termina scol basico.
Tambe e informe ta agrega cu Republica Dominicana tabatin algun avance den union di pareha entre menornan di 18 aña, di 37 % na 2014 te 32 % na 2019. Tambe e cantidad di union tempran di menornan di 15 aña a baha, na 2014 ainda 12 % y na 2019, 9%.
E informe di Unicef ta bisa tambe cu mucha muher cu discapacidad ta enfrenta discriminacion multiple encuanto nan derechonan, debi na riesgio mas grandi, tanto dentro di hogar como pafor; di violencia, di lesion o abuso, di abandono o di trato negligente, y tres biaha mas riesgo di violacion.
