Alexandra van Huffelen: Aruba a pospone reforma di belasting sin informa; Restructuracion di aparato publico ta di un embergadura y lo tin impacto grandi

Aruba ta cumpli bon cu ehecucion di e landspakket, cu excepcion e reformanan riba tereno di belasting. Ademas ta cla pa reorganisa aparato publico, cu ta bay tin un embergadura y impacto grandi, mientras cu maneho laboral y structura social lo tin e base pa reforma na fin di December.

Asina Secretario di Estado Alexandra van Huffelen ta informa Parlamento Hulandes. E Secretario di Estado pa Asuntonan di Reino a bisa cu Conseho di Minister di Reino ta revisa peticionnan pa sosten di likides y con ta cumpli cu e reformanan den e landspakketnan, basa riba e rapportnan di ehecucion cu e Tijdelijke Werkorganisatie, TWO ta compila. Manera ta conoci, e TWO ta haci e trabao anticipando e COHO.

Aruba no a pidi sosten di likides mas pa resto di 2022. Segun College Aruba financieel toezicht, CAft, Aruba no mester di dje, particularmente pasobra di e saldo positivo di 19 miyon florin. E calculacion aki por cambia ainda, na momento cu Aruba bin cu mas informacion. Es mas, CAft ta pendiente e informacion aki. Riba e deficit financiero maximo manera palabra cu Hulanda, CAft lo conseha Gobierno di Reino basa riba informacionnan cu Aruba lo duna.

A dicidi cu Aruba, entrante 2023 lo mester tin presupuesto cu ta cumpli cu e normanan presupuestario palabra cu Hulanda den e protocol di 2018 y e ley supervision financiero Aruba, LAft. Segun Van Huffelen, Gobierno di Reino a conclui cu ya Aruba lo no por apela riba articulo 23 di LAft, esta cu tin circunstancia excepcional pa desvia di e normanan. Esaki a base di e analisis di e Organisacion Mundial di Salud, WHO riba e pandemia di Covid, y e hecho cu a bin un recuperacion fuerte na 2021 y 2022, mientras cu inflacion ta proyecta di baha na 2023. “Den caso cu e recuperacion un biaha mas ta afecta pa otro caso excepcional, Gobierno di Reino lo evalua un biaha mas e peticion pa por desvia di e normanan presupuestario palabra.”

Reportahe ehecucion TWO

TWO hunto cu Aruba ta trahando desde comienzo di 2021 pa duna e landspakket su contenido. E landspakket ta e totalidad di reforma cu Hulanda y Aruba a acorda riba nan na fin di 2020. Van Huffelen a presenta Parlamento Hulandes e progreso di implementacion di e reformanan aki.

Y segun TWO, su evaluacion riba e trabao na Aruba en general ta positivo. Locual si ta preocupante ta e capacidad di ehecucion. Pa motibo di esaki ta bin retraso den algun medida, pa por implementa e agenda di ehecucion (di e reformanan). Awor cu mas y mas actividad ta drenta e fase di implemntacion, mester di perseverancia y un guia hopi dirigi pa e proceso. Locual mester di mas atencion na Aruba ta e area di belasting, ya cu a dicidi pa no continua cu e implementacion di e structura nobo pa Januari 1, 2023, esta e BTW.

Aruba a tuma e decision riba su mes, sin ningun deliberacion cu TWO. “Esaki ta rekeri ahustacion politico,” Van Huffelen a bisa. “E falta di capacidad pa maneho denter Gobierno di Aruba ta keda un factor di risico pa progreso di e reformanan cu pronto mester keda implementa. Lo pone e necesidad di capacidad specifico riba papel, segun e area di reforma pa asina por busca asistencia den forma concreto.

Mientrastanto a formula e criterionan pa e personanan cu mester dirigi e programanan y ta trahando internamente na Aruba pa permiti capacidad adicional pa e trabaonan cu mester haci riba e tereno di Maneho Financiero, cu ta parti di e landspakket.

Tambe a apunta asina yama kwartiermakers, esta personanan cu mester prepara e proyecto pa e sector di wega di placa, empresaria y clima di inversion. E gasto di salario di e personanan aki ta carga pa Hulanda y Aruba.

A determina e ruta pa Maneho Financiero conforme e planificacion, cu ta duna bista riba tur actividad cu mester tuma luga pa asina logra un maneho financiero duradero. Tambe ta inclui recomendacionnan pa fortifica e organisacion financiero. “Ta trata aki di un trayecto multianual, unda prome mester pone e base na ordo. Cu esaki, no solamente por logra informacion financiero confiabel, tambe lo garantisa e legalidad di entrada y gasto, cu a termino lo mester traduci nan mes den un declaracion di control aproba na momento cu Aruba presenta su cuentanan anual.”

Banda di esaki, lo tin otro plan cu mester delinea e pasonan pa un sistematica pa presupuesto, y a tuma pasonan concreto riba e tereno di ley y reglanan financiero y con pa haci e informacion financiero controlabel.

Pa loke ta e tema di Costo y Efectividad di Sector Publico cu ta tema B den e landspakket a tuma pasonan concreto na Juli pa reorganisa e aparato publico. Esaki ta un trayecto grandi pa Aruba mirando e embergadura y impacto, Van Huffelen a bisa. A dicidi como tal pa ehecuta e trayecto cu sosten di un partido independiente. Ya caba tin e documentonan cla pa haci e destaho pa e proyecto aki. Den e siguiente periodo lo coordina e proyecto aki na nivel politico y di maneho pa asina por ehecuta e destaho.

E revision di seis entidadnan publico a cana bon y e rapport final lo keda determina na nivel administrativo fin di 2022, conforme e planificacion. Esaki lo inclui reaccion di maneho pa loke ta e recomendacionnan y implementacion. Entre otro nan lo ta dirigi riba structura y escogencianan strategico di maneho.

A base di e decision di Gobierno pa no implementa e structura nobo di belasting pa 1 di Januari 2023, lo no tin e evaluacion di progreso pa desaroyo continuo di Servicio di Impuesto, SIAD. Banda di esey, “tin preocupacion pa e adelanto di mas desaroyo di SIAD, particularmente riba e tereno di capacidad y si por logra pone e pagonan di belasting na dia. Tambe tin combersacionnan pa sa con necesidad di capacidad por duna contenido na esaki,” Van Huffelen a informa Tweede Kamer.

Gobierno di Aruba a aproba e nota Labor y Seguridad y ta forma e base pa un consulta social amplio cu lo mester a haya forma na September. Gremionan di Aruba a participa den e congreso tripartite y e resultado di e consulta lo produci e decision en principio final pa reforma di e maneho di mercado laboral y structura social, cu mester ta cla pa fin di December.

E proceso largo interno di banda di Gobierno di Aruba a conduci cu implementacion di e plan multianual integral pa bringa e fenomeno di tuma trahadonan stranheronan indocumenta den servicio no a bin na vigor ainda. Entretanto a cuminza cu e proceso y lo inicia cu ehecucion di e asina yama ‘quick wins’ di e plan di implementacion.

Pa loke ta e tema di Salud Publico, manera hopi hende a ripara, e lista positivo nobo di AZV a drenta na vigor. Aruba mester a presenta fin di September, un ruta den concepto con, basa riba recomendacionnan di rapport Hubben, lo implementa reforma pa haci e fondo di AZV sostenibel.