(NTN24) – Embahador di Colombia na Merca, Luis Gilberto Murillo a papia tocante e visa Mericano pa Colombianonan, un di e procesonan mas compleho cu ciudadanonan ta enfrenta na momento di programa un biahe pa e pais nort Americano.
E proceso, cu actualmente ta tarda hasta dos aña pa haya un cita, a bira e principal dolor di cabes pa esnan cu kier haya e documento.
Di esaki, embahador di Colombia a papia cu Noticias RCN y a manifesta su punto di bista, indicando cierto incoherencia na momento cu ta bisa cu Colombia ta e principal aliado strategico di Merca den e region, pero Colombianonan tin hopi inconveniente pa ricibi e visa Americano.
“Esaki no ta bon mira y ta genera problemanan cu e hecho cu ta tarda hasta 850 dia pa un persona por haya un cita despues di presenta e solicitud. Ademas di esey, nos tin informacion cu ta indica cu Colombia ta e pais cu mas ta tarda na mundo pa haya e documento aki.”
E funcionario a referi na e proposicion cu ta busca permiti cu Colombianonan por biaha na teritorio nort Americano den calidad di turista, sin necesidad di tin e documento aki.
Segun e palabranan di Murillo, e iniciativa “a wordo plantia di manera verbal”, pa loke e funcionario ta spera di por formalisa “muy pronto” y pa poblacion Colombiano por biaha den calidad di turista sin visa pa Merca.
Tambe, embahador di Colombia na Washington a papia tocante un Statuut Special di Proteccion pa Colombianonan na Merca y a indica cu ta necesario cu ciudadanonan Colombiano lo por ricibi un alivio migratorio ya cu Colombia ta conta cu status principal di socio strategico di e pais nort Americano den e region.
