Adapta presupuesto 2022… Pa evita aanwijzing…

Cu interes nos a tuma nota di e carta cu e entidad di supervision di Reino CAft a manda pa gobierno di Aruba, como nan reaccion riba e proyecto di ley di modificacion di presupuesto 2022.

E interes no ta trata solamente e cambionan cu gobierno tin pensa den e presupuesto modifica, sino tambe den ki sentido e cambionan ta tene cuenta cu e recomendacionnan cu CAft a haci pa cu presupuesto 2022, despues cu esaki a keda aproba pa parlamento. E recomendacionnan aki ta base pa e intencion di un ‘aanwijzing’ di cual gobierno di Aruba a haya notificacion, cu e espacio pa formula nan ‘visie’ riba esaki. A base di e reaccion di gobierno di Aruba, Conseho di Ministro di Reino posiblemente e luna aki lo tuma un decision si ta necesario pa duna Aruba instruccion pa cambia presupuesto 2022 mas ainda.

Naturalmente nos no sa kico exactamente tin den e intencion di aanwijzing cu gobierno di Aruba a haya pa reacciona ariba, esey ta confidencial, pero sigur por lo menos parcialmente esey tin un relacion directo cu e recomendacionnan haci pa CAft. Y pa nos comprende bon e cuadro den cual cosnan ta tumando lugar actualmente, ta importante tuma na cuenta cu gobierno no tin solamente obligacion di contesta e notificacion di aanwijzing di gobierno di Reino, pero por dicidi di haci lo necesario pa evita tal instruccion, incorporando den su modificacion di presupuesto e cambionan cu ta den e eventual aanwijzing, si ta desea di haci esey. Y ta aki ta importante di analiza kico CAft ta trece dilanti tocante e cambio di ley di presupuesto, pasobra ta tarea di duna nan opinion/conseho riba esaki tambe.

Y loke CAft ta trece dilanti ta cu nan no ta haya cu e modificacion di presupuesto 2022 ta bay suficientemente leu y ta formula nuebe punto riba cual nan ta desea pa gobierno ainda haci cambio den e presupuesto complementario aki. E nuebe puntonan ey tin relacion cu e 13 puntonan di recomendacion haci na mei, den e sentido cu CAft ta haya cu gobierno di Aruba no a atende e puntonan anterior di manera suficiente y ta propone e cambionan aki ainda. Esaki na su turno ta trece pa gobierno di Aruba e tarea di contesta e conseho di CAft, sea oponiendo nan dunando un splicacion, sea incorporando e cambionan sugeri den e proyecto di ley cu mester bay parlamento.

Kico esaki ta implica? Cu tin basta trabao pa haci ainda, pasobra e reaccion di gobierno mester acompaña e cambio di presupuesto na parlamento, y lo ta duna tambe un impresion te unda gobierno ta dispuesto pa sigui e conseho duna. Y esaki na su turno ta duna un impresion con leu gobierno di Aruba ta dispuesto pa sigui e instruccion duna en principio den e notificacion di aanwijzing, cu por conduci na un aprobacion di gobierno di Reino, cu e adaptacionnan haci pa gobierno ta suficiente, y cu no mester tuma e medida di un aanwijzing mas. Den caso cu gobierno di Reino ta haya cu e cambionan haci no ta cumpli cu e requisitonan cu a pone, anto por bin un instruccion, di cual e contenido no lo ta conoci, pasobra nos no sa kico ta e exigencianan specifico di gobierno di Reino; al fin y al cabo, no necesariamente mester sigui tur e 13 recomendacionnan di CAft.

Ademas, e cumplimento parcial cu cierto recomendacionnan ta haci cu e nuebe recomendacionan formula den e carta di september 2022 no ta ‘copy paste’ for di e lista anterior.

E pregunta anto, na e momento aki, ta kico lo sucede proximamente. Lo tin un reunion di Conseho di Ministro di Reino riba e tema aki, o ta bay warda pa gobierno laga parlamento aproba e cambio di presupuesto, pa despues CAft bolbe duna su conseho, pa despues finalmente gobierno di Reino tuma un decision? Ta parce nos improbable cu gobierno di Reino ta bay tuma un decision, sin tuma na cuenta tanto e ‘visie’ – confidencial – di gobierno di Aruba y e presupuesto modifica cu ta contene si of no, o parcialmente, e exigencianan formula den e notificacion di ‘aanwijzing’ cu gobierno a ricibi.

Nos por imagina e ora ey e reaccion di un persona cu ta bisa: “Pero asina aki, aña ta caba y no tin aanwijzing ainda…? Corecto, pero esey no ta bisa cu tin scapatorio, si e cambio di presupuesto no ta conforme e exigencianan formula den e propuesta di instruccion cu gobierno a haya. Lo bin un conseho nobo di CAft despues cu e ley pasa parlamento, y esey por resulta atrobe den un conseho negativo di CAft, y eventualmente un recomendacion nobo pa un instruccion. Esey ta e mecanismo cu ta ‘ingebouwd’, incorpora den e ley di supervision, unda cada ley o cambio di ley di presupuesto ta haya su follow up den un conseho di CAft posterior.

Y, tin algo mas. Cambionan desea pa gobierno di Reino cu no ta tuma lugar den e aña aki, lo tuma lugar despues. No ta cuestion cu ta keda sin cumpli y e asunto ta termina ey mes. Esey ta haci anto cu e medidanan cu lo mester tuma despues na 2023 lo ta mas fuerte ainda. Y ta esaki CAft a trata di bisa den nan ultimo recomendacion: tuma cierto medida e aña aki caba, sino e ta bira demasiado pa otro aña… Nos no ta mira un reaccion conforme di gobierno.